હું ખરેખર ગાય જેવો છું કે..?

અણધાર્યા વૅકેશનનો પહેલો દિવસ દિવાળીની જેમ ઊજવવો હતો, પણ..

- રાજુ પટેલ

કોણ છે આ છોકરી? ક્યાં જોઈ છે મેં આને?’

જીન્સ પૅન્ટ અને ગુલાબી ટી-શર્ટ પહેરેલી એ યુવતીને મેં ત્રીજી વાર ધારી ધારીને જોઈ, પણ યાદ ન આવ્યું. આને મેં જોઈ તો છે, પણ ક્યાં? એ છોકરીએ મને તીરછી નજરથી જોઈને પોતાનું મોં ફેરવી લીધું.

‘તુમને ભી કુછ ચોરી કિયા હૈ ક્યા?’ અચાનક મારી બાજુમાં બેઠેલા મુલિસ જેવા એક માણસે મને ધીમા અવાજમાં પૂછ્યું અને હું ચમક્યો. અચાનક મને ભાન થયું કે અત્યારે હું એક પોલીસસ્ટેશનમાં બેઠો છું અને એ પણ એક આરોપીની જેમ! મારે મારી જાતને નિર્દોષ સાબિત કરવાની છે.

- પણ અચાનક હું કઈ રીતે આમ ફસાઈ ગયો? એની નાનકડી સ્ટોરી છે.

ઑફિસમાં રિનોવેશન ચાલતું હોવાથી મારા બૉસ મોતીવાલા એક મહિના માટે લંડન એમના સાસરે ચાલ્યા ગયા છે. ઑફિસમાં અમને અણધાર્યું વેંકૈશન મળી ગયું છે અને એ માણવાની હું હજી શરૂઆત કરી રહ્યો હતો.

વૅકેશનનો પહેલો દિવસ દિવાળીની જેમ ઊજવવો જોઈએ એમ વિચારી મેં નક્કી કર્યું કે કોઈ મૉલમાં જઈ થોડુંઘણું શૉપિંગ કરીશ, મલ્ટિપ્લેક્સમાં કોઈ ફિલ્મ જોઈશ, પછી કોઈ હોટેલમાં લંચ લઈ ઘરે આવી મસ્ત ઊંઘ ખેંચી કાઢીશ.. અને રાત્રે ફોન પર કોઈ વેબ-સિરીઝ જોઈશ. કાલે ક્યાં વહેલું ઊઠવાનું છે કે ઑફિસ જવાનું છે?

ઘરને તાળું મારતાં વિચાર્યું કે એટીએમમાંથી પહેલાં થોડા પૈસા કઢાવી લઉં. તાળું મારીને ચાવી હંમેશની જેમ મેં મારા પર્સના અંદરના ખાનામાં સેરવી દીધી.

નીચે ઊતરી થોડું ચાલતાં રસ્તાની સામે તરફ એટીએમ હતું. રસ્તો ઝડપથી ક્રૉસ કરવા જતાં મારો પગ લપસ્યો અને હું એક પાર્ક થયેલી બાઈક સાથે અથડાતાં પડી ગયો અને બાઈક પણ ગબડી ગઈ. માંડ ઊભો થયો ત્યાં ‘માઝી બાઈક લા કોણી હાથ લાવલા?’ એમ સવાલ પૂછતો કરડા દેખાવનો એક પોલીસ હવાલદાર ક્યાંકથી આવી ગયો. આજુબાજુ ભેગા થયેલા લોકોએ મારી તરફ આંગળી ચીંધી. એ હવાલદારે મને ગુસ્સાથી જોતાં પૂછ્યું: ‘બહુત ચરબી હૈ તેરે કો?’

‘સૉરી, એક્સિડન્ટલી મેં બાઈક સે ટકરા ગયા.’ મેં ગરીબડા ચહેરે ખુલાસો આપતાં કહ્યું. એ હવાલદારે આગઝરતી નજરે મને જોયો. એ કંઈક બોલવા જતો હતો, પણ ત્યારે જ એના વૉકીટૉકી પર એના ઉપરીનો મેસેજ આવ્યો એટલે એ ‘હો સાહેબ, મી બઘતો, સાહેબ..' એમ બોલવા માંડ્યો અને એનું ધ્યાન નથી એ જોઈ હું ચુપચાપ એટીએમમાં સરકી ગયો.