શૅરના ભાવ ફરી ઊંચકાશે, વિશ્વાસ મેળવતાં વધુ સમય લાગશે!

અદાણી કેસમાં સેબી, સરકાર, શૅરબજાર અને રોકાણકારો, વગેરેનું ધ્યાન સુપ્રીમ કોર્ટમાં ચાલતી સુનાવણી પર રહેશે. સવાલ એ છે કે આ પ્રકરણ ઈન્વેસ્ટરોનાં હિતમાં નવા સુધારા લાવી શકશે?

- જયેશ ચિતલિયા

અદાણી ઉદ્યોગસમૂહ સામેના આક્ષેપો વિશે તપાસ કરવા 'સેબી' કેટલી સક્ષમ?

અદાણી–હિન્ડનબર્ગ વિવાદ પ્રકરણમાં આગળ શું થશે એ તો સમય-સંજોગ કહેશે, પરંતુ અત્યારે તો આ પ્રકરણને પરિણામે શૅરબજારમાં રોકાણકારોનાં હિતોની રક્ષા-કાળજી માટે સરકાર અને નિયમનતંત્ર સેબી (સિક્યોરિટીઝ ઍન્ડ એક્સચેન્જ બોર્ડ ઑફ ઈન્ડિયા) વધુ સક્રિય-સજાગ અને જાગ્રત થવાની આશા બળકટ બની છે.

અદાણી કેસમાં જે બન્યું એ પછી મામલો સુપ્રીમ કોર્ટમાં ગયો હોવાથી તેમ જ બીજાં કારણોસર પણ વિવિધ સ્તરે તપાસ ચાલુ થઈ છે. સુપ્રીમ કોર્ટે પહેલા જ દિવસે સેબીને રોકાણકારોનાં હિતોની રક્ષા માટે એનું માળખું કેવું છે એ સંબંધી અહેવાલ સુપરત કરવા કહ્યું હતું. આ પછી સરકાર ઈન્વેસ્ટર્સ પ્રોટેક્શનના માળખા અંગે સમીક્ષા કરવા એક ખાસ પૅનલ રચવા તૈયાર થઈ. આમાં પણ સર્વોચ્ચ અદાલતે સરકારને સ્પષ્ટ કહ્યું કે આ સમિતિનાં નામ કોર્ટ નક્કી કરશે, સરકાર નહીં.

સુપ્રીમ કોર્ટમાં હિન્ડનબર્ગના રિપોર્ટ અંગે બે જાહેર હિતની અરજીની સુનાવણી ચાલી રહી છે. બીજી બાજુ, રોકાણકારોને થયેલા ભારે નુકસાનની ચિંતા પણ ઘેરી બની છે. સેબીએ અદાણી ગ્રુપ સામેના તમામ આક્ષેપ અંગે પણ તપાસ શરૂ કરી દીધી છે. સાથોસાથ અદાણી ગ્રુપના સ્ટૉક્સમાં ભારે ધોવાણ થયા બાદ કંઈક અંશે રિકવરીનો દૌર પણ શરૂ થયો છે. આમાં કેટલી સાર્થકતા અને કેટલી નિરર્થકતા એ તો આગામી સમય કહેશે.

શું નિયમનતંત્રો સતર્ક નથી રહેતાં?