તમારું મૂળ કયું?

મૂળ ટકાવવું અઘરું કામ છે. વંશની દૃષ્ટિએ વાત કરીએ તો એક ભયાનક સંભાવના દષ્ટિગોચર થાય છે. ઘણા પરિવારમાં એકનું એક સંતાન હોય એ વિવિધ કારણોસર લગ્નના બંધનમાં બંધાતું નથી એટલે વંશવેલો માત્ર અંશવેલો બની આથમવાની તૈયારી કરવા માંડે

- હિતેન આનંદપરા

મૂળ સાથે જ વળગી રહેવું છે

માટીનું માત્ર એવું કહેવું છે.

                                       – સંજુ વાળા

યે માટી સભી કી કહાની કહેગી.. નવરંગ ફિલ્મનું આ ગીત અત્યંત માર્મિક છે.

રાજા-રાણી આવતાં-જતાં રહેશે, પણ માટી યથાવત્ રહેશે. માટીનું કામ મૂળને સાચવવાનું છે. મૂળ રોપવાનું કાર્ય કાં તો કુદરત કરે અથવા માણસજાતે કરવું પડે. ઈશ્વર આવીને ખેતરમાં બીજ વાવતો નથી, એ તો ખેડૂતે જ કરવું પડે. પ્રત્યેક જણે જિંદગીમાં યથાશક્તિ-યથામતિ વાવેતર કરવાનું છે.