ડાયમંડ નગરીની આ છે ગોલ્ડન ઘારી!

ખાણી-પીણીના પ્રેમમાં સુરતીલાલાઓને કોઈ ન પહોંચે. દશેરા પછીના આ દિવસોમાં સુરતીઓનો આ પ્રેમ ઘારી રૂપે છલકે છે. ચાલો જોઈએ, શેનો છે ટ્રેન્ડ અત્યારે ઘારીબજારમાં.

- અરવિંદ ગોંડલિયા

સુરતીઓ માટે એવું કહી શકાય કે ખાણી-પીણીના પ્રેમમાં આ પ્રજા કોઈ તહેવાર પણ શરૂ કરી દે. બસ, કોઈ કારણ હોવું જોઈએ. બોલો, નહીંતર કોઈના મરણ વખતે કોઈ ચીજ ખાવાની પ્રથા પડે ખરી? હા, સુરતમાં અગાઉ મરણ નિમિત્તે ઘારી ખાવાની પ્રથા હતી. સ્મશાનમાં ડાઘુઓ સહિતના લોકોને ઘારી પીરસવામાં આવતી. કદાચ એટલે જ આજે પણ લગ્નપ્રસંગમાં મીઠાઈ તરીકે ઘારી બહુ જોવા મળતી નથી.

જો કે સુરતીઓ આખા શિયાળા દરમિયાન તો ઘારી ખાય છે જ, આ મસ્તરામ પ્રજાએ એક તહેવાર જ ઘારીને નામે કરી દીધો છે. એ છે શરદ પૂનમ પછીની રાત એટલે કે ચંદની અથવા ચંદી પડવો. ઘારી સુરતની ખાસ મીઠાઈ છે એમ ચંદની પડવો એ સુરતીઓનો પોતીકો તહેવાર છે. ચંદી પડવાની રાત્રે સુરતીઓ ઘરની અગાસી કે ફૂટપાથ પર પરિવાર અને મિત્રો સાથે બેસીને ઘારી અને ભૂસાની જ્યાફત ઉડાવે છે. સુરતમાં આમ તો પિસ્તા, કેસર, બદામ, ચૉકલેટ, કૂકીઝ, માવામલાઈ ઘારી જેવી દસથી વધુ વરાઈટી મળે છે. ડાયાબિટીસના દરદીઓ માટે તો સુગર-ફ્રી ઘારી પણ છે, પણ છેલ્લાં ત્રણ વર્ષથી ગોલ્ડન ધારીએ એક નોખું જ માર્કેટ ઊભું કર્યું છે. આ ગોલ્ડન ઘારીની એક કિલોની કિંમત જ અધધધ નવથી અગિયાર હજાર રૂપિયા છે. સામાન્ય રીતે ઘણી બધી મીઠાઈ પર ચાંદીનો વરખ જોવા મળે છે, પણ આ ઘારી પર સોનાનો વરખ છે એટલે જ એ ગોલ્ડન ઘારી તરીકે ઓળખાય છે અને એની કિંમત પણ એના નામ જેવી છે.

ભલભલાના મોંમાં પાણી લાવી દેતી ઘારીની દસેક પ્રકારની વરાઈટી ઉપલબ્ધ છે. હેલ્થ કૉન્સિયસ લોકો માટે સુર-ફ્રી ઘારી પણ મળે છે