તમે છો તો અમે છીએ...

અમારી સફર ને તમારો તરાપો જવું પાર સામે, તમે સાથ આપો.

- હિતેન આનંદપરા

અમૃત મહોત્સવ એક મોટી ઘટના છે. અર્ધશતાબ્દી અને શતાબ્દી વચ્ચેનો આ પડાવ એક તરફ અતીતને જુએ છે તો બીજી તરફ આવી રહેલાં રજત વર્ષોને. આ ઉજવણી એક સંસ્થાની હોય ત્યારે અનેક લોકોની ચેતના, પ્રતિભા અને યોગદાન એમાં સામેલ હોય. ચિત્રલેખા સાપ્તાહિક ની વાત હોય તો એની સફળતામાં સૌથી વધારે યોગદાન વાચકોનું છે, જેમનો પ્રેમ એક મજબૂત પિલરનું કામ કરે છે.

કોરોના કાળથી ભલભલા પ્રિન્ટ મિડિયાને માઠી અસર પહોંચી છે. અંગ્રેજી અખબારો પણ એમાં બાકાત નથી. વાંચવાની આદત છૂટતી જાય છે અને મોબાઈલ ફોન કે કમ્પ્યુટર પર બ્રાઉઝ કરવાની આદત વધતી જાય છે. મોટા કે લગ્નસમારંભમાં જઈએ ત્યારે ગમે એટલી અલગ અલગ વાનગી ચાખીએ, સંતોષ તો દાળ-ભાત કે ખીચડી-કઢીથી જ થાય છે. અનેક મોટા કલાકારો ભોજનસમારંભમાં યજમાનના આગ્રહને વશ ડિશ લઈને થોડું ચાખે, પછી ઘરે આવીને ભાખરી ખાય ત્યારે જ એમને સંતોષ થાય.