યુરિનરી ઈનકન્ટિનન્સઃ શરમથી સમસ્યા નહીં ઉકેલે

અનિયંત્રિત પેશાબની વ્યાધિ પાછળ વધતી ઉંમર સિવાય અન્ય કારણ પણ હોઈ શકે.

- ડૉ. અર્ચના પારસ શાહ

૫૯ વર્ષનાં રાધિકાબહેન અત્યંત સક્રિય ગૃહિણી. જો કે છેલ્લા કેટલાક સમયથી એમના જીવનમાં ચિંતાજનક ફેરફાર આવ્યો હતો. એ લાંબો સમય ઘરથી બહાર રહેવાનું પણ ટાળતાં હતાં. એમને ડર હતો કે જો હું બહાર જઈશ તો મારે પેશાબ જવા માટે દોડવું પડશે એટલે જ્યાં જાય ત્યાં બાથરૂમ છે કે નહીં એની પહેલાં પૂછતાછ કરી લેતાં. પોતાની આ સ્થિતિથી એ બહુ શરમ અનુભવતાં હતાં. આ સમસ્યાથી કંટાળીને એમણે એક ગાયનેકોલૉજિસ્ટની સલાહ લીધી. ગાયનેકોલૉજિસ્ટે આ સમસ્યાનું નિદાન યુરિનરી ઈનકન્ટિનન્સ તરીકે કર્યું અને કહ્યું કે ઘણી સ્ત્રીને આ ઉંમરે આવી તકલીફ થતી હોય છે.

ગાયનેકોલૉજિસ્ટે એમને સર્જિકલ અને નૉન-સર્જિકલ એમ બન્ને વિકલ્પ દ્વારા સારવારના ઉપાય વિશે સમજાવ્યું. વિગતવાર સમજ્યા પછી રાધિકાબહેને સર્જરી કરાવવાનો નિર્ણય કર્યો. જો કે એમને ડર હતો કે સર્જરીને પગલે એમણે થોડા દિવસ સુધી પથારીમાં પડ્યા રહેવું પડશે, પણ એમની ધારણાથી વિપરીત ગણતરીના દિવસોમાં એમની સમસ્યામાં નોંધપાત્ર સુધારો થયો.

રાધિકાબહેન જે સમસ્યાથી પીડાતાં હતાં એ યુરિનરી ઈનકન્ટિનન્સ એટલે કે અનિયંત્રિત પેશાબની સમસ્યા. અનેક પુરુષો અને મહિલાઓ યુરિનરી ઈનકન્ટિનન્સથી પીડાતાં હોય છે. આ લોકો પેશાબ પર નિયંત્રણ રાખી શકતાં નથી. જો કે ઘણા લોકો શરમને કારણે કોઈને પણ એમનાં લક્ષણ વિશે જણાવતા નથી અથવા તો આનો કોઈ ઈલાજ નથી એમ વિચારી ચુપચાપ સહન કર્યા કરે છે.