માનવમિત્ર ગણાતા વરુ અચાનક માનવભક્ષી કેમ બની ગયા?

નેપાળ સરહદને અડીને આવેલા ઉત્તર પ્રદેશના બહરાઈચ જિલ્લા તથા આસપાસના વિસ્તારોમાં કેટલાક મહિનાથી વરુઓએ રીતસર આતંક વેર્યો છે. સામાન્ય રીતે માણસોથી દૂર રહેતા આ શરમાળ પ્રાણીના ટોળાએ દસ જણના જાન લીધા છે. જો કે નિષ્ણાતોના મતે માણસો પર વરુના હુમલા વધવા પાછળનું કારણ છે...

- નિતુલ ગજ્જર (વડોદરા)

સમયઃ રાતના આશરે ૧૦:૦૦,

સ્થળઃ રાયપુર, ખૈરીઘાટ, ઉત્તર પ્રદેશ.

એક આધેડ વયની મહિલા આખા દિવસનો થાક ઉતારવા પોતાના ઘરે આવી સૂતી છે. રાતનો સમય અને ગ્રામ્યવિસ્તાર હોવાથી ચોતરફ સન્નાટો ફેલાયેલો છે. પેલી મહિલા ઘરનો દરવાજો કોઈ કારણોસર બંધ કરવાનું ચૂકી ગઈ છે. અચાનક ત્યાંથી એક વરુ ઘરમાં ઘૂસી જાય છે અને પેલી મહિલાને ડોકેથી પકડી એને બહારની તરફ ઘસડી જાય છે. સવારે ઘરથી અમુક કિલોમીટર છેટે વગડામાં એ મહિલાની અડધી ખાધેલી લાશ મળે છે ત્યારે ગામવાસીઓને જાણ થાય છે કે વધુ એક શિકાર થયો છે.

આ વર્ણન ઉત્તર પ્રદેશના બહરાઈચ પ્રાંતની એક ઘટનાનું છે, જ્યાં કેટલાક મહિનાથી વરુનું ટોળું માનવભક્ષી બન્યું હોવાનું સાંભળવા મળી રહ્યું છે. વરુએ આ વિસ્તારમાં વિવિધ ગામડાંઓના દસથી વધુ લોકોને મારી નાખ્યા છે અને ૨૮ લોકો વરુના હુમલાને કારણે ઘાયલ થયા છે. માનવવસતિ પર વરુના એક પછી એક હુમલાને કારણે આ પ્રાંતમાં લોકો ભયના ઓછાયા હેઠળ જીવે છે. ત્યાં સુધી કે એમને રક્ષણ પૂરું પાડવા વન વિભાગે અમુક લોકોને તો સ્થળાંતર કરાવવા સુધીનાં પગલાં ભર્યાં છે.

બીજી બાજુ, ઉત્તર પ્રદેશ વન વિભાગના અધિકારીઓએ વરુ પકડવાનું શરૂ કર્યું છે. કુલ સાત વરુની ટોળી હોવાનું જાણવા મળ્યું છે અને એમાંથી છ વધુ પકડવામાં વન વિભાગને સફળતા મળી છે. અત્યારે તો ઉત્તર પ્રદેશ વન વિભાગ અને કેટલીક સ્થાનિક સંસ્થાઓ વરુને પકડવા માટે કાર્યરત છે અને સંભવતઃ ચિત્રલેખાનો આ અંક તમારા હાથમાં હશે ત્યાં સુધી બધા વરુ પાંજરે પુરાઈ ગયા હશે.

ઉત્તર પ્રદેશના બહરાઈચ તથા આસપાસના વિસ્તારોમાં વરુના હુમલા વધવા માંડ્યા એ પછી વન વિભાગે વરુને પકડવા પહેરો લગાડવો પડયો.

સામાન્ય રીતે વાઘ કે દીપડાએ માણસનો શિકાર કર્યો હોય એવી વાત સાંભળવા મળે છે, પરંતુ વરુએ કોઈ એક વિસ્તારમાં આ રીતે ઉપદ્રવ મચાવ્યો હોય એવું જવલ્લે જ બને છે. જો કે સવાલ એ પણ કે શું ખરા અર્થમાં આ ઘટના પાછળ માત્ર વરુ જવાબદાર છે?