ഈശി മിക്സ്ചറും ഷേയ്ക്ക് അബ്ദുള്ളയും

ആത്മകഥ

-  കെ.വി. തോമസ്

1964 പ്രീയൂണിവേഴ്സിറ്റി പരീക്ഷകഴിഞ്ഞ് ഡിഗ്രിയ്ക്ക് പഠിക്കുവാൻ തേവര കോളേജ് തന്നെയാണ് തെരഞ്ഞെടുത്തത്. എന്റെ ആഗ്രഹം മലയാളം എടുക്കണ മെന്നായിരുന്നു. എന്നാൽ ജേഷ്ഠനോടൊപ്പം പ്രിൻസിപ്പൽ തിയോബോൾഡ് അച്ചന്റെ മുന്നിൽ ചെന്നപ്പോൾ കെമിസ്ട്രി വിഭാഗം തലവൻ എം.വി. വർഗ്ഗീസ് സാറും ഇരിപ്പുണ്ടായിരുന്നു. എന്റെ മാർക്ക് ലിസ്റ്റ് പരിശോധിച്ച വർഗ്ഗീസ് സാർ, കെമിസ്ട്രിയ്ക്ക് ചേരാനാണ് നിർദ്ദേശിച്ചത്.

പ്രീയൂണിവേഴ്സിറ്റിയിൽ കെമിസ്ട്രി ഉൾപ്പെടെയുള്ള സയൻസിൽ എനിക്ക് നല്ല മാർക്കുണ്ട്. അതിനാൽ കെമിസ്ട്രിയായിരിക്കും എനിക്ക് കൂടുതൽ യോജിച്ചത് എന്നായിരുന്നു വർഗ്ഗീസ് സാറിന്റെ അഭിപ്രായം. മലയാളം മതി എന്ന് നേരത്തെ തന്നെ ജോഷ്ഠൻ ജോസഫിനോട് ഞാൻ പറഞ്ഞി രുന്നെങ്കിലും വർഗ്ഗീസ് സാറിന്റെ അഭിപ്രായത്തോട് ചേട്ടനും യോജിച്ചു. അങ്ങിനെ കെമിസ്ട്രി മെയിനും മാത്തമാറ്റിക്സ്, ഫിസിക്സ് സബ്സിഡിയറി, മലയാളം ഭാഷാ വിഷയവുമായി തെരഞ്ഞെടുത്ത് തേവര കോളേജിൽ തന്നെ ഡിഗ്രി കോഴ്സ് വിദ്യാർത്ഥിയായി. അന്ന് കെമിസ്ട്രിയിലെ എന്റെ സീനിയറായി കുമ്പളങ്ങിക്കാരൻ തൈവേലിക്കകത്ത് ജോർജ്ജും ഉണ്ടായിരുന്നു.