യുപി ഗാരന്റിക്ക് ഇളക്കം തട്ടുന്നുവോ?

ഡൽഹി ഡയറി

-  കെ.പി. രാജീവൻ

കഴിഞ്ഞ 10 വർഷമായി രണ്ട് തവണ ഇന്ത്യ ഭരിച്ച നരേന്ദ്ര മോദിക്ക് തുണയായത് യുപിയുടെ പിന്തുണയായിരുന്നു. യുപി കീഴടക്കുന്നവർ ഇന്ത്യ ഭരിക്കുമെന്ന ആപ്തവാക്യം 2014 ലും 2019 ലും ബിജെപി അന്വർത്ഥമാക്കി. യുപിയിലെ 80 സീറ്റുകളിൽ 71 സീറ്റുകളും 2014 ൽ സീറ്റും 2019 ൽ 62 സീറ്റും ലഭിച്ച ബിജെപി രണ്ട് തവണയും കേന്ദ്രഭരണം കയ്യാളി. എന്നാൽ ഇത്തവണ നരേന്ദ്ര മോദിയുടെ തുടർഭരണത്തിന് യുപി ഗാരന്റിയുണ്ടോ? ഉണ്ടാകില്ലെന്ന് അഖിലേഷ് യാദവും രാഹുൽ ഗാന്ധിയും വാർത്താസമ്മേളനം നടത്തി ആണയിടുമ്പോഴും അത് വെറും രാഷ്ട്രീയ അവകാശവാദമായി എഴുതിത്തള്ളിയാലും അടുത്ത കാലത്ത് യുപിയിലുണ്ടായ ചില സംഭവവികാസങ്ങൾ വിശകലനം ചെയ്യേണ്ടതുണ്ട്.

രജപുത്ര രോഷം വിനയാകുമോ?

ബിജെപിക്കെതിരായി ഉത്തർപ്രദേശിൽ രജപുത സമൂഹത്തിൽ പുകയുന്ന അതൃപ്തി മൂലമുണ്ടാകുന്ന തിരിച്ചടി എത്രത്തോളമാകുമെന്നതാണ് ഒരു വസ്തുത. ബിജെപിയുടെ അവഗണനയിൽ പ്രതിഷേധിച്ച് ക്ഷത്രിയ സമൂഹം മഹാപഞ്ചായത്തുകൾ നടത്തി.

ഈ വിഭാഗത്തിലെ താക്കൂർ സമുദായത്തെ ബിജെപി അവഗണിച്ചതായി ചൂണ്ടിക്കാട്ടി എസ്പി, ബിഎസ്പി പാർട്ടികൾ ശക്തമായ പ്രചരണം ആരംഭിച്ചു കഴിഞ്ഞു. കഴിഞ്ഞ ദിവസം ഗാസിയാബാദിലെ തിരഞ്ഞെടുപ്പ് റാലിയിൽ ബിഎസ്പി അദ്ധ്യക്ഷ മായാവതി ഈ വിഷയം ഉന്നയിക്കുകയുണ്ടായി. താക്കൂർ സമുദായത്തെ ബിജെപി അവഗണിക്കുകയായിരുന്നുവെന്ന് അവർ ആരോപിച്ചു. ബിഎസ്പിയുടെ ഗാസിയാബാദ് സ്ഥാനാർത്ഥി താക്കൂർ വംശജനായ നന്ദ് കിഷോർ പുദിർ ആണെന്നത് ശ്രദ്ധേയമാണ്.

ബുദ്ധ് നഗറിൽ ചേർന്ന തിരഞ്ഞെടുപ്പ് റാലിയിൽ എസ്പി അദ്ധ്യക്ഷൻ അഖിലേഷ് യാദവും ഈ വിഷയം ഉന്നയിച്ചു.

ഉറക്കം കെടുത്തുന്ന മഹാപഞ്ചായത്തുകൾ

 പടിഞ്ഞാറൻ യുപിയിലടക്കം നടക്കുന്ന ക്ഷത്രിയ സമൂഹത്തിന്റെ മഹാപഞ്ചായത്തുകൾ ബിജെപിയുടെ ഉറക്കം കെടുത്തുകയാണ്. മീററ്റ് ജില്ലയിലെ സർദാനയിലും ഖേഡയിലും കാദിലും സിസൗലിയിലും സഹറൻ പൂരിലെ നാനൗട്ടയിലും ഠാക്കൂർ സമുദായത്തിലെ ആളുകൾ സ്വാഭിമാൻ മഹാപഞ്ചായത്തുകൾ സംഘടിപ്പിച്ചു. ആയിരങ്ങൾ പാത്രത്തിൽ ഉപ്പ് ഒഴിച്ച് അവർ ബിജെപി ക്കെതിരെ പ്രതിജ്ഞയെടുത്തു. ആദ്യഘട്ട തിരഞ്ഞെടുപ്പ് നടന്ന 19 ന് മുമ്പ് തന്നെ പടിഞ്ഞാറൻ യുപിയിൽ നിന്ന് ബിജെപിക്കെതിരെ അത്തരമൊരു പ്രതിഷേധം നടന്നത് പാർട്ടിയെ ആശങ്കപ്പെടുത്തുന്നുണ്ട്.