പുസ്തകഭ്രാന്തൻ

ഫേസ് ബുക്ക് പോസ്റ്റ്

- എൻ. ഇ. സുധീർ

നിത്യചൈതന്യയതി ഒരു പുസ്തകഭ്രാന്തനായിരുന്നു. അദ്ദേഹം പുസ്തകങ്ങൾ മോഷ്ടിച്ചിട്ടുണ്ട്. മൂന്നു പുസ്തകങ്ങളെ ആകെ മോഷ്ടിച്ചിട്ടുള്ളൂ എന്ന് കുറ്റസമ്മതം ചെയ്തിട്ടുമുണ്ട്. രണ്ടെണ്ണം ഹവായ് യൂണിവേഴ്സിറ്റിയിൽ നിന്നും ഒരെണ്ണം സിഡ്നി യൂണിവേഴ്സിറ്റിയിൽ നിന്നും. രസകരമായ കാര്യം ഈ വിദേശ സർവകലാശാലകളിൽ നിന്നും മോഷ്ടിച്ച മൂന്നും ഇന്ത്യൻ പുസ്തകങ്ങളായിരുന്നു! ഒരു വർഷം കഴിഞ്ഞപ്പോൾ കുറ്റബോധത്തോടെ രണ്ടെണ്ണം തിരിച്ചു കൊടുത്തു. മറ്റേതിനെപ്പറ്റി ഒന്നും പറയുന്നില്ല. അന്ത്യനാളിൽ ദൈവം, എന്നോട് നീ മോഷ്ടിച്ചിട്ടുണ്ടോ? എന്ന് ചോദിച്ചാൽ, ഒന്നു വിക്കിയിട്ട്, ഇല്ല തമ്പുരാനെ എന്ന് പറയും എന്നും യതി എഴുതിയിട്ടുണ്ട്. ആ വിക്കൽ തിരിച്ചു കൊടുക്കാത്ത മൂന്നാമത്തെ പുസ്തകത്തെ ഓർത്താവും.