ട്രംപിനെ ആര് പിടിച്ച് കെട്ടും?

യു.എസ്. ഇലക്ഷൻ

-  ശുഭ ജോസഫ്, ന്യൂയോർക്കിൽ നിന്ന്

നാലാഴ്ചകൾ കൊണ്ട് അമേരിക്കൻ തെരഞ്ഞെടുപ്പ് രാഷ്ട്രീയം അസാധാരണമായ വളവു തിരുവുകളിലൂടെയാണ് കടന്നുപോകുന്നത്. കൃത്യമായി പറഞ്ഞാൽ കഴിഞ്ഞ ജൂൺ 27 വരെ അമേരിക്കൻ രാഷ്ട്രീയം ഒരു തട്ടും തടവുമില്ലാതെ ശാന്തമായി ഒഴുകുകയായിരുന്നു. അന്ന് രാത്രി അറ്റ്ലാന്റയിലെ സിഎൻഎൻ നെറ്റ് വർക്കിന്റെ സ്റ്റുഡിയോയിൽ ജോ ബൈഡൻ - ഡോണൾഡ് ട്രംപ് പ്രസിഡൻഷ്യൽ ഡിബേറ്റ് നടന്ന ആ 90 മിനിറ്റിനു ശേഷം എല്ലാം മാറിമറിഞ്ഞു.

പിന്നീട് അങ്ങോട്ട് സംഭവ പരമ്പരകളായിരുന്നു. അത് ഒടുവിൽ എത്തിനിൽക്കുന്നത് കമലാ ഹാരിസ് എന്ന കറുത്ത വർഗക്കാരിയായ, ഏഷ്യൻ അമേരിക്കക്കാരിയായ ഒരു വനിതയുടെ മുൻപിലാണ്. ഒബാമ എന്ന കറുത്ത വർഗക്കാരൻ മാറ്റിയെഴുതിയ അമേരിക്കൻ ചരിത്രത്തിൽ മറ്റൊരു വിപ്ളവകരാമായ ചരിത്രം കുറിക്കാൻ കമലാ ഹാരിസിന് ആകുമോ? അതോ വെളുത്തവർഗക്കാർക്ക് ഔന്നത്യം ഉണ്ടെന്നു വിശ്വസിക്കുന്ന America First എന്ന നിലപാടുള്ള ട്രംപിനെ ഒരിക്കൽ കൂടി ജനം സ്വീകരിക്കുമോ?

ജനാധിപത്യം സംരക്ഷിക്കാനാണ് പ്രസിഡന്റ് ജോ ബൈഡൻ വീണ്ടും തിരഞ്ഞെടുപ്പിൽ മത്സരിക്കാൻ ഇറങ്ങിയത്. എന്നാൽ അധികാരത്തിൽ നിന്ന് താഴെയിറങ്ങിയാൽ മാത്രമേ ആ ലക്ഷ്യത്തിലെത്താൻ സാധിക്കൂ എന്ന് അദ്ദേഹത്തിനു മനസ്സിലായി .