വിഗ്രഹവുമായി പിണറായി എത്രനാൾ മോദിയെ മുഖം കാണിക്കേണ്ടിവരും?

പിണറായി എന്ന സൂര്യൻ കെട്ട് സൂര്യനാണെന്ന് അൻവർ പരസ്യമായി വിളിച്ചുപറഞ്ഞപ്പോൾ അതിനെ ശക്തമായി എതിർക്കാൻ സിപിഎമ്മിലും എൽഡിഎഫിലും ഒരു നേതാവും ഉണ്ടായില്ല എന്നത് ശ്രദ്ധേയമാണ്.

- എസ്. ജഗദീഷ് ബാബു

രാഷ്ട്രീയത്തിൽ ഇന്നലെകളില്ല, ഇന്ന് മാത്രം. വർത്തമാനകാല രാഷ്ട്രീയത്തിൽ രാജാവ് നഗ്നനാണെന്ന് വിളിച്ചുപറഞ്ഞ പി.വി അൻവറാണ് താരം. ലോക്സഭാ പ്രതിപക്ഷ നേതാവ് രാഹുൽ ഗാന്ധിയുടെ ഡിഎൻഎ പരിശോധന എന്ന വിവാദ പ്രസ്താവന തിരുത്തി നെഹ്റു കുടുംബത്തിന്റെ പാരമ്പ ര്യവും രാഹുൽ ബഹുമാന്യനാണെന്നും പറഞ്ഞതിലൂടെ പറ്റിപ്പോയ തെറ്റ് തിരുത്തിയിരിക്കുകയാണ് ഇടതു സ്വതന്ത്രനായ അൻവർ എംഎൽഎ.

പിണറായി എന്ന സൂര്യൻ കെട്ട സൂര്യനാണെന്ന് അൻവർ പരസ്യമായി വിളിച്ചുപറഞ്ഞപ്പോൾ അതിനെ ശക്തമായി എതിർക്കാൻ സിപിഎമ്മിലും എൽഡിഎഫിലും ഒരു നേതാവും ഉണ്ടായില്ല എന്നത് ശ്രദ്ധേയമാണ്. രാഹുലിന്റെ ഡിഎൻഎ പരിശോധിക്കണമെന്ന് പി.വി അൻവർ തിരഞ്ഞെടുപ്പ് കാലത്ത് പ്രസംഗിച്ചപ്പോൾ അത് ഏറ്റുപിടിച്ച പിണറായിക്കെതിരെ തുറന്ന യുദ്ധ പ്രഖ്യാപനമാണ് അതേ എംഎൽഎ പരസ്യമായി നടത്തിയത്. അതോടെ പരിശോധിക്കപ്പെടുന്നതും പരിഗണിക്കപ്പെടുന്നതും അൻവറിന്റെ രാഷ്ട്രീയ ഡിഎൻഎയാണ്.