எடப்பாடியிடம் டீல் பேசும் பா.ஜ.க.!

ஹலோ தலைவரே, தேர்தலைக் குறிவைத்து தி.மு.க. அரசு விறுவிறுப்பாகத் திட்டங்களைத் தயாரித்து வருகிறதே?

ஆமாம்பா, எந்த மாநிலத்திலும் இல்லாத வகையில் அனைத்து குடும்பத் தலைவிகளுக்கும் மகளிர் உரிமைத் தொகையை வழங்க முதல்வர் தயாராகிறாரே?

உண்மைதாங்க தலைவரே, தனது தேர்தல் அறிக்கையில் சொன்னதையெல்லாம் செயல்வடிவமாக மாற்றிவரும் முதல்வர், அதில் விடுபட்டிருக்கும் வாக்குறுதிகளெல்லாம் படிப்படியாக நிறைவேற்றப்படும் என்று அண்மையில் அறிவித்தார். இப்போது அது குறித்த ஆய்வுகள் கோட்டையில் விறுவிறுப்பாக நடந்துவருகின்றன. புதிதாக என்னென்ன மக்கள் நலத் திட்டங்களை அறிவிக்கலாம் என்றும் முதல்வர் ஆலோசிக்கிறாராம். அதேபோல், தேர்தல் வாக்குறுதிகளில் ஒன்றான மகளிருக்கு மாதந்தோறும் உரிமைத் தொகை வழங்கும் திட்டத்தில், தகுதியுள்ள மகளிரை மட்டும் தேர்வுசெய்து, அவர்களுக்கு மாதந்தோறும் ஆயிரம் ரூபாயை வழங்கி வருகிறது தி.மு.க. அரசு. அடுத்தகட்டமாக, ரேசன் அட்டை வைத்திருக்கும் அத்தனை மகளிருக்கும் அதே ஆயிரம் ரூபாயை வழங்குவதற்கான கோப்புகள் இப்போது நகர்ந்து வருகின்றன. இந்த மகளிர் உரிமைத் திட்டம் பெண்கள் மத்தியில் பெரும் வரவேற்பைப் பெற்றிருப்பதால்தான், இதை அனைத்து மகளிருக்குமாக விரிவுபடுத்தித் தேர்தல் அஸ்திரமாக்க முனைந்திருக்கிறது தி.மு.க. அரசு என்கிறார்கள்.

தி.மு.க. அரசின் இந்த திடீர் முடிவுக்கு வேறு காரணங்களும் கூறப்படுகிறதே?