మేయర్ వా..! కమీషన్ల బ్రోకర్ వా..?

డబ్బులివ్వండి... ఇళ్ళు కట్టుకోండి అంటున్న పీర్జాదిగూడ మున్సిపల్ మేయర్ జక్కా వెంకట్ రెడ్డి

• పార్కులు, రోడ్లు కబ్జా పెట్టుకోండి అడుగం.. సెట్ బ్యాక్ లు చూడం.. ఎన్ని అంతస్తులైన పట్టించుకోం..

• మెయిన్ రోడ్డుకు ఇరువైపులా భారీ అక్రమ షెడ్లు..

• ఎఫ్ఎఎల్, బఫర్ జోన్లు, చివరికి స్మశానంలో అక్రమ నిర్మాణం చేసినా చూడం.. - కోట్ల రూపాయలు నష్ట పోతున్నా పట్టించుకోని మున్సిపల్ కమీషనర్, టౌన్ ప్లానింగ్ అధికారులు

హైదరాబాద్ 29 జనవరి (ఆదాబ్ హైదరాబాద్) : బీఆర్ఎస్ ప్రభుత్వ హయాంలో పీర్జాదిగూడ మున్సిపల్ కార్పొరేషన్ పూర్తిగా అవినీతి మయం అయిపోయింది. ఇంకా బీఆర్ఎస్ మేయర్ అతని సహచర ప్రజాప్రతినిధులు, అధికారులు అవినీతి, ఆక్రమాలను మరువలేక పోతున్నారు.

ధనార్జనే ధ్యేయంగా అవినీతి అక్రమాలకు పాల్పడుతూ ప్రభుత్వ ఆదాయానికి భారీగా గండి కొడుతూ, సంపాదనకు ఎగబడ్డారు. మున్సిపల్ కార్పొరేషన్ లోని పలు డివిజన్లలో అనుమతులు ఒకలా నిర్మాణాలు మరోలా చేపడుతున్నారు. జనావాసాల మధ్య భారీ గోదాంలు లేదా భారీ షెడ్లు నిర్మాణం చేపడుతుంటే ఎన్ని పిర్యాదులు వచ్చిన అధికారులు అటువైపు కన్నెత్తి చూడరు.