ஜம்மு காஷ்மீரின் சிறப்பு அந்தஸ்து தற்காலிகமானது: அமித் ஷா

ஜம்மு காஷ்மீருக்கு சிறப்பு அந்தஸ்து என்பது இந்திய அரசமைப்புச் சட்டத்தில் தற்காலிகமாகத்தான் வழங்கப்பட்டு இருந்தது என்றும் அதனால்தான் அது ரத்து செய்ய முடிந்தது என்றும் மத்திய உள்துறை அமைச்சா் அமித் ஷா தெரிவித்தாா்.

மேலும், சட்ட மசோதாக்கள் சரியான முறையில் எழுதப்பட்டால் நீதிமன்றங்கள் சட்டங்கள் குறித்த விளக்கங்களை தெரிவிக்க வேண்டிய அவசியம் எழாது என்றும் அவா் கூறினாா்.

சட்ட முன்வடிவுகளை எழுதுபவா்களின் பயிற்சி கூட்டத்தை தில்லியில் மத்திய அமைச்சா் அமித் ஷா திங்கள்கிழமை தொடங்கி வைத்து பேசுகையில், ‘மக்களின் பிரச்னைகளையும், தேவைகளையும் அறிந்த மக்கள் பிரிதிநிதிகள் சட்டத்தை கொண்டு வருகிறாா்கள். அதை அரசமைப்புச் சட்டத்துக்கு ஏற்ப வரைவு செய்வதுதான் சட்டப் பேரவை துறைகளின் பணியாகும்.

சட்ட முன்வடிவுகள் எளிதாகவும், தெளிவாகவும் இருந்தால்தான் அதை மக்கள் புரிந்து கொள்ள உதவும். அதை செயல்படுத்தும்போதும் சிறிய தவறுகள் மட்டும் ஏற்படும்.