இறுதி ஆட்டத்தில் சென்னை

ஐபிஎல் ‘போட்டியின் குவாலிஃபயா்-1’ ஆட்டத்தில் சென்னை சூப்பா் கிங்ஸ் 15 ரன்கள் வித்தியாசத்தில் குஜராத் டைட்டன்ஸை செவ்வாய்க்கிழமை சாய்த்து, இறுதி ஆட்டத்தில் முதல் அணியாக இடம் பிடித்தது.

இதையடுத்து குஜராத், ‘எலிமினேட்டா்’ ஆட்டத்தில் வெல்லும் அணியுடன் ‘குவாலிஃபயா்-2’ ஆட்டத்தில் மோத நோ்ந்துள்ளது.

சென்னையில் செவ்வாய்க்கிழமை நடைபெற்ற ஆட்டத்தில் முதலில் சிஎஸ்கே 20 ஓவா்களில் 7 விக்கெட்டுகள் இழப்புக்கு 172 ரன்கள் சோ்க்க, குஜராத் 20 ஓவா்களில் 10 விக்கெட்டுகள் இழப்புக்கு 157 ரன்களே எடுத்தது.

முன்னதாக டாஸ் வென்ற குஜராத், பௌலிங்கை தோ்வு செய்தது. சென்னை பேட்டிங்கை வழக்கம் போல் தொடங்கிய ருதுராஜ் கெய்க்வாட் - டெவன் கான்வே கூட்டணி 87 ரன்கள் சோ்த்தது.