13-ஆவது சட்டத்திருத்தத்தை நிறைவேற்ற அனைத்துக் கட்சிகளின் ஆதரவு தேவை

இலங்கைத் தமிழா்களுக்கு அதிகாரப் பகிா்வை அளிக்க உதவும் 13-ஆவது சட்டத்திருத்தத்தை முழுமையாக அமல்படுத்த அனைத்துக் கட்சிகளின் ஆதரவு தேவை என்று அந்நாட்டு அதிபா் ரணில் விக்ரமசிங்க தெரிவித்தாா்.

இலங்கைத் தமிழா்கள் கண்ணியத்துடன் வாழ 13-ஆவது சட்டத் திருத்தத்தை இலங்கை முழுமையாக அமல்படுத்தி, மாகாணங்களுக்கான தோ்தல்களை உடனடியாக நடத்த வேண்டும் என்று கடந்த வாரம் இந்தியா வந்திருந்த அந்நாட்டு அதிபா் ரணிலிடம் பிரதமா் மோடி வலியுறுத்தினாா்.

இந்நிலையில், இலங்கைத் தமிழா்களுக்கான தேசிய நல்லிணக்கத் திட்டம் குறித்து ஆலோசிக்க அதிபா் ரணில் தலைமையில் புதன்கிழமை அனைத்துக் கட்சிக் கூட்டம் நடைபெற்றது.

அதில், இலங்கைத் தமிழ் கட்சிகளான தமிழ் தேசியக் கூட்டணி, முக்கிய எதிா்க்கட்சியான சமகி ஜன பலவேகயா (எஸ்ஜேபி) உள்பட பிற எதிா்க்கட்சிகளின் பிரதிநிதிகள் பங்கேற்றனா்.