நாட்டின் வளர்ச்சி தடையின்றி தொடரும்: பிரதமர் மோடி

இந்தியாவை வளர்ந்த தேசமாக்க நாட்டுமக்கள் உறுதி கொண்டுள்ளனர்; எனவே, நாட்டின் வளர்ச்சி தங்கு தடையின்றி தொடரும் என்று பிரதமர் மோடி தெரிவித்தார்.

தன்னைப் பொருத்தவரை ஏழைகள், இளைஞர்கள், பெண்கள் மற்றும் விவசாயிகளே நாட்டிலுள்ள 4 பெரிய 'ஜாதிகள்' என்றும் அவர் குறிப்பிட்டார்.

மத்திய அரசின் பல்வேறு முக்கியத் திட்டங்களின் பலன்கள், உரிய காலத்துக்குள் அனைத்துப் பயனாளிகளையும் சென்றடை வதை உறுதி செய்யும் நோக்கில், நாடு முழுவதும் 'வளர்ந்த இந்தியாவுக்கான உறுதியேற்பு யாத்திரை' எனும் இயக்கம் மேற்கொள்ளப்பட்டு வருகிறது.

இந்த இயக்கத்தின் மூலம் பலனடைந்தவர்களுடன் பிரதமர் மோடி காணொலி முறையில் வியாழக்கிழமை கலந்துரையாடினார். அப்போது, அவர் பேசிய தாவது: என்னைப்பொருத்தவரை ஏழைகள், இளைஞர்கள், பெண்கள் மற்றும் விவசாயிகளே நாட்டிலுள்ள 4 பெரிய 'ஜாதிகள். இந்த 4 தரப்பினரின் முன்னேற்றம், இந்தியாவை வளர்ந்த நாடாக உருவாக்கும்.

'வளர்ந்த இந்தியாவுக்கான உறுதியேற்பு யாத்திரைக்கு நாட்டின் அனைத்து மூலைகளிலும் மிகுந்த வரவேற்பு கிடைத்து வருகிறது.

கடந்த 10 ஆண்டுகளில் அரசு மற்றும் அரசின் முயற்சிகள் மீதான மக்களின் நம்பிக்கை பெருமளவில் அதிகரித்திருப்பதே அதற்கு காரணம். நாட்டில் முந்தைய அரசுகள், அந்த மக்கள் மீது 'நிலப்பிரபுத்துவ' மனநிலையைக் கொண்டிருந்தன.