தேர்தல் பத்திரம்: எஸ்பிஐ மனு தள்ளுபடி

இன்று மாலைக்குள் விவரங்களைச் சமர்ப்பிக்க உச்சநீதிமன்றம் உத்தரவு

தேர்தல் நன்கொடை பத்திரங்கள் தொடர்பான முழுமையான விவரங்களை செவ்வாய்க்கிழமை (மார்ச் 12) வேலை நேரத்துக்குள் தேர்தல் ஆணையத்திடம் பாரத ஸ்டேட் வங்கி (எஸ்) பிஐ) சமர்ப்பிக்க வேண்டும்' என்று உச்சநீதிமன்றம் திங்கள்கிழமை உத்தரவிட்டது.

இந்த விவரங்களைச் சமர்ப்பிக்க ஜூன் 30-ஆம் தேதி வரை 4 மாதகால அவகாசம் கோரிய எஸ்பிஐ மனுவைத் தள்ளுபடி செய்து உச்சநீதிமன்றம் இந்த உத்தரவைப் பிறப்பித்தது.

அரசியல் கட்சிகள் தேர்தல் நன்கொடைகள் பெறுவதில் வெளிப்படைத்தன்மையை உறுதிப்படுத்தும் நடவடிக்கை என்ற பெயரில் மத்திய அரசுகடந்த 2018-ஆம் ஆண்டு அறிமுகம் செய்த தேர்தல் நன்கொடை பத்திர நடைமுறை, தகவல் அறியும் உரிமைச் சட்டம் மற்றும் அரசமைப்புச் சட்டப் பிரிவு 19(1)-இன் கீழ் பேச்சுரிமை மற்றும் கருத்துரிமையை மீறும் வகையில் உள்ளது என்று குறிப்பிட்ட உச்சநீதிமன்றத்தின் 5 நீதிபதிகள் கொண்ட அரசியல் சாசன அமர்வு, இந்த நடைமுறையை ரத்து செய்து கடந்த பிப்ரவரி 15-ஆம் தேதி தீர்ப்பளித்தது.

மேலும், அரசிடம் கணக்கு கேட்கும் உரிமை நாட்டு மக்களுக்கு உள்ளது என்று குறிப்பிட்ட நீதிபதிகள், கடந்த 2019-ஆம் ஆண்டு ஏப்ரல் 12-ஆம் தேதிமுதல் பிப்ரவரி 15-ஆம் தேதி வரை தேர்தல் நன்கொடை பத்திரங்கள் விநியோகம் தொடர்பான முழுமையான விவரங்களை மார்ச் 6-ஆம் தேதிக்குள் தேர்தல் ஆணையத்திடம் எஸ் பிஐ சமர்ப்பிக்க வேண்டும்; அந்த விவரங்களை தேர்தல் ஆணையம் தனது வலைதளத்தில் மார்ச் 13ஆம் தேதிக்குள் பொதுமக்கள் பார்வைக்குப் பதிவேற்றம் செய்யவேண்டும்' என்றும் உத்தரவிட்டனர்.