கன்னியாகுமரி விவேகானந்தர் மண்டபம் பிரதமரின் 45 மணி நேர தியானம் தொடக்கம்

கன்னியாகுமரி விவேகானந்தர் மண்டபத்தில் 45 மணி நேர தியானத்தை பிரதமர் நரேந்திர மோடி வியாழக்கிழமை இரவு 7 மணிக்கு தொடங்கினார்.

பிரதமரின் இந்த தியானம் தேர்தல் விதிமுறைகளை மீறிய செயல் என்றும் இதை தொலைக்காட்சிகள் நேரலையில் ஒளிபரப்பக் கூடாது என்றும் காங்கிரஸ் உள்ளிட்ட எதிர்க்கட்சிகள் குற்றம்சாட்டின. தேர்தல் ஆணையத்தில் காங்கிரஸ் கட்சி புகார் அளித்தது.

எனினும், திட்டமிட்டபடி மக்களவைத் தேர்தலின் இறுதிக் கட்ட பிரசாரத்தை பஞ்சாபில் முடித்து கொண்ட பிரதமர் மோடி, புது தில்லியில் இருந்து தனி விமானத்தில் கேரள மாநிலம் திருவனந்தபுரத்துக்கு வியாழக்கிழமை வந்தார். அங்கிருந்து விமானப்படை ஹெலிகாப்டரில் கன்னியாகுமரி அரசு விருந்தினர் மாளிகை வளாகத்தில் உள்ள தளத்தில் மாலை 5.10 மணிக்கு வந்திறங்கினார்.

அவரை அரசு அதிகாரிகள் வரவேற்றனர். சுமார் 30 நிமிஷங்கள் ஓய்வெடுத்த பிரதமர், அங்கிருந்து பகவதி அம்மன் கோயிலுக்கு காரில் சென்றார். கோயில் நிர்வாகம் சார்பில் நிதின்சங்கர் போற்றி, சீனிவா சன்போற்றி ஆகியோர் பூரண கும்ப மரியாதை அளித்தனர். கோயில் மேலாளர் ஆனந்த், பிரதமருக்கு பகவதியம்மன் படத்தை வழங்கி வரவேற்றார்.