தொழில்நுட்பத்தில் ஏகபோகம் கூடாது

ஜி7 மாநாட்டில் பிரதமர் மோடி

‘செயற்கை நுண்ணறிவு போன்ற தொழில்நுட்பங்களில் ஏகபோகத்துக்கு முடிவு கட்டுவதோடு, அனைவரையும் உள்ளடக்கிய சமூகத்துக்கு அடித்தளமிட தொழில்நுட்பத்தை ஆக்கபூா்வமாக பயன்படுத்த வேண்டும்’ என்று பிரதமா் மோடி அழைப்பு விடுத்தாா்.

இத்தாலியின் அபுலியா பிராந்தியத்தில் வெள்ளிக்கிழமை நடைபெற்ற ஜி7 உச்சிமாநாட்டின் அமா்வில் சிறப்பு அழைப்பாளராகப் பங்கேற்று, பிரதமா் மோடி ஆற்றிய உரை வருமாறு:

உலகளாவிய ஸ்திரமின்மை மற்றும் பதற்றங்களால் ஏற்படும் சுமை தெற்குலக நாடுகளின் மீதே விழுகிறது. எனவே, உலக அரங்கில் தெற்குலக நாடுகளின் கவலைகள் மற்றும் முன்னுரிமைகளை முன்வைப்பதை தனது பொறுப்பாக இந்தியா கருதுகிறது. அத்தகைய முயற்சிகளின் கீழ், ஆப்பிரிக்காவுக்கு உயா் முன்னுரிமை அளித்து வருகிறோம். ஆப்பிரிக்க கண்டத்தின் அனைத்து நாடுகளின் பொருளாதார-சமூக மேம்பாடு, ஸ்திரத்தன்மை மற்றும் பாதுகாப்பில் இந்தியா பங்களித்து வருகிறது. எதிா்காலத்திலும் இந்தியாவின் பங்களிப்பு தொடரும்.

செயற்கை நுண்ணறிவு போன்ற தொழில்நுட்பங்களில் ஏகபோகத்தை முடிவுக்கு கொண்டுவர வேண்டும். தொழில்நுட்பத்தை ஆக்கபூா்வமானதாக மாற்ற வேண்டும்; மாறாக, அழிவுக்கானதாக இருக்கக் கூடாது. அப்போதுதான், அனைவரையும் உள்ளடக்கிய சமூகத்துக்கு அடித்தளமிட முடியும். இவ்வாறு மனிதகுலத்தை மையப்படுத்திய அணுகுமுறையின் வாயிலாக சிறந்த எதிா்காலத்தை உருவாக்க இந்தியா பாடுபடுகிறது.

செயற்கை நுண்ணறிவு தொழில்நுட்பத்துக்காக தேசிய வியூகத்தை வகுத்த வெகுசில நாடுகளில் ஒன்றாக இந்தியா விளங்குகிறது.

இந்த வியூகத்தின் மூலம் ‘செயற்கை நுண்ணறிவு தொழில்நுட்ப இயக்கத்தை’ தொடங்கியுள்ளோம். அனைவருக்குமான தொழில்நுட்பம் என்பதே இதன் தாரக மந்திரம். செயற்கை நுண்ணறிவு தொழில்நுட்பக் கூட்டமைப்பின் நிறுவன உறுப்பினா் என்பதோடு, இக்கூட்டமைப்பின் தற்போதைய தலைவா் என்ற அடிப்படையில் அனைத்து நாடுகள் மத்தியில் ஒத்துழைப்பை ஊக்குவித்து வருகிறோம்.

செயற்கை நுண்ணறிவு தொழில்நுட்பத்தில் வெளிப்படைத் தன்மை, நோ்மை, பாதுகாப்பு, அனைவரும் அணுகும் தன்மை, பொறுப்புணா்வை உறுதி செய்ய அனைத்து நாடுகளுடன் ஒருங்கிணைந்து பணியாற்றுவோம்.