ஜம்மு-காஷ்மீரில் பயங்கரவாதிகள் மீது கடும் நடவடிக்கை : பாதுகாப்புப் படைகளுக்கு அமித் ஷா உத்தரவு

காஷ்மீரில் மேற்கொள்ளப்பட்டதைப் போல ஜம்முவில் பயங்கரவாதிகளுக்கு எதிராக கடும் நடவடிக்கை எடுக்க பாதுகாப்புப் படைகளுக்கு மத்திய உள்துறை அமைச்சர் அமித் ஷா உத்தரவிட்டார்.

"ஜம்மு-காஷ்மீரில் பயங்கரவாதம் என்பது மிகவும் திட்டமிட்டு நடத்தப்படும் வன்முறைச் செயல்கள் என்ற நிலையில் இருந்து மறைமுக யுத்தம் என்ற அளவுக்கு சுருங்கியுள்ளது' என்றும் அமித் ஷா தெரிவித்தார்.

உடனடி பதிலடி: ஜம்மு பிராந்தியத்தில் அண்மையில் நடைபெற்ற பயங்கரவாத சம்பவங்களைத் தொடர்ந்து அந்த யூனியன் பிரதேசத்தின் பாதுகாப்பு தொடர்பாக தில்லியில் அமித் ஷா தலைமையில் ஞாயிற்றுக்கிழமை உயர்நிலை ஆலோசனைக் கூட்டம் நடைபெற்றது. உயரதிகாரிகள் பங்கேற்ற இந்தக் கூட்டத்தில் பயங்கரவாதச் செயல்களுக்கு உடனடியாகப் பதிலடி தரும் வகையில் செயல்படுமாறு பாதுகாப்பு அமைப்புகளுக்கு அவர் உத்தரவிட்டார்.

கூட்டத்தில் அமித் ஷா பேசியதாவது: பயங்கரவாதத்தை வேரறுக்க மத்திய அரசு உறுதியுடன் உள்ளது. பாதுகாப்பு அமைப்புகளிடையே ஒருங்கிணைப்பு அவசியமாகும்.

பிரதமர் நரேந்திர மோடி தலைமையில் பயங்கரவாத சகிப்பின்மை என்ற கொள்கையை அரசு பின்பற்றுகிறது. ஜம்மு-காஷ்மீரில் பயங்கரவாதத்தை வேரறுக்க அரசு எந்த நடவடிக்கையையும் விட்டு வைக்காது.