பாகிஸ்தான் இன்னும் பாடம் கற்கவில்லை : கார்கிலில் பிரதமர் மோடி

'வரலாற்றில் இருந்து பாகிஸ்தான் எந்தப் பாடமும் கற்கவில்லை; அவர்களின் தீய நோக்கங்கள் ஒருபோதும் நிறைவேறாது. பயங்கரவாத முயற்சிகள் அனைத்தையும் இந்திய ராணுவம் முழு பலத்துடன் ஒடுக்கும்' என்று பிரதமர் நரேந்திர மோடி கூறினார்.

துணிச்சல்மிக்க லடாக்கில் உள்ள கார்கில் பகுதியில் இந்தியா, பாகிஸ்தான் இடையே கடந்த 1999-ஆம் ஆண்டில் சுமார் 3 மாதங்கள் நடைபெற்ற போரில் இந்தியா வெற்றி பெற்ற தன் 25-ஆம் ஆண்டு தினம் (கார்கில் விஜய் திவஸ்) வெள்ளிக்கிழமை கொண்டாடப்பட்டது.

இதையொட்டி, லடாக் யூனியன் பிரதேசத்துக்கு வருகை தந்த பிரதமர் மோடி, கார்கில் அருகே திராஸ் பகுதியில் உள்ள போர் நினைவிடத்தில் மரியாதை செலுத்தினார்.

பின்னர் நடைபெற்ற நிகழ்ச்சியில், பாகிஸ்தானை எச்சரித்து அவர் பேசியதாவது: பயங்கரவாதத்தின் 'நிபுணர்கள்' எனது குரலை நேரடியாக கேட்கும் இடத்தில் இருந்து பேசிக் கொண்டிருக்கிறேன். பயங்கரவாதத்தை ஆதரிப்போருக்கு ஒன்றைக் கூற விரும்புகிறேன். அவர்களின் தீய நோக்கங்கள் ஒருபோதும் நிறைவேறாது.

பாடம் கற்காத பாகிஸ்தான்: வரலாற்றில் இருந்து பாகிஸ்தான் எந்தப் பாடமும் கற்கவில்லை. பயங்கரவாதத்தைப் பயன்படுத்தி மறைமுகப் போரில் பாகிஸ்தான் தொடர்ந்து ஈடுபட்டு வருகிறது. ஆனால், பயங்கரவாத முயற்சிகள் அனைத்தையும் இந்திய ராணுவம் முழு பலத்துடன் ஒடுக்கும்.