மத்திய அரசின் சக்கர வியூகத்தை தகர்ப்போம் : மக்களவையில் ராகுல் காந்தி

பிரதமர் மோடி தலைமையிலான மத்திய அரசின் சக்கர வியூகத்தால் நாடெங்கிலும் அச்சம் மிகுந்த சூழ்நிலை நிலவுகிறது; அந்த சக்கர வியூகத்தை ’இந்தியா' கூட்டணி தகர்க்கும் என்று மக்களவை எதிர்க்கட்சித் தலைவர் ராகுல் காந்தி தெரிவித்தார்.

2024-25-ஆம் ஆண்டுக்கான மத்திய பட்ஜெட், நாடாளுமன்றத்தில் கடந்த ஜூலை 23-ஆம் தேதி தாக்கல் செய்யப்பட்டது. இதையடுத்து, மக்களவையில் பட்ஜெட் மீதான விவாதம் நடைபெற்று வருகிறது.

இந்த விவாதத்தில் மக்களவை எதிர்க்கட்சித் தலைவர் ராகுல் காந்தி திங்கள்கிழமை பங்கேற்றுப் பேசினார். பிரதமர் மோடி மற்றும் மத்திய அரசை கடுமையாக விமர்சித்ததால், ஆளும்கட்சி உறுப்பினர்கள் எதிர்ப்பை பதிவு செய்தனர். அத்துடன், ராகுல் உரையின்போது அவைத் தலைவர் ஓம் பிர்லா அடிக்கடி குறுக்கிட்டு, சில கருத்துகளைத் தவிர்க்கும்படி அறிவுறுத்தவும் நேரிட்டது.

எதிர்ப்பு முழக்கங்களுக்கு இடையே ராகுல் பேசியதாவது: பெரு வணிகங்களின் கட்டமைப்பை ஊக்குவித்தல் மற்றும் ஜனநாயக அமைப்பு முறையை அழிக்கும் ஏகபோக அரசியலை வலுப்படுத்துவதே 2024-25-ஆம் ஆண்டுக்கான மத்திய பட்ஜெட்டின் ஒரே நோக்கமாக உள்ளது.

ஆயிரக்கணக்கான ஆண்டுகளுக்கு முன்னர் (மகாபாரத இதிகாசத்தில்) ஹரியாணாவின் குருஷேத்திரத்தில் அபிமன்யு என்ற இளைஞரை சக்கர வியூகத்தில் 6 பேர் கொன்றனர். சக்கர வியூகம் என்பது வன்முறையும் அச்சமும் கொண்டதாகும். சக்கர வியூகத்தில் சிக்கிய அபிமன்யு கொல்லப்பட்டார்.

சக்கர வியூகமானது, தாமரை மலரைப் போல் காட்சியளிக்கும் பத்ம வியூகம் என்றும் அழைக்கப்படுகிறது. இந்த 21-ஆம் நூற்றாண்டில் நமது நாட்டில் மற்றொரு "சக்கர வியூகம்' உருவாக்கப்பட்டுள்ளது. அதுவும் தாமரை வடிவில் உள்ளது. பிரதமர் மோடி தனது மார்பில் அந்தச் சின்னத்தைத் தரித்துள்ளார்.