வயநாடு மறுவாழ்வுப் பணிகளுக்கு உதவி : நிலச்சரிவு பகுதிகள் ஆய்வுக்குப் பின் பிரதமர் உறுதி

வயநாட் டில் நிவாரண, மறுவாழ்வு பணிகளுக்கு தேவையான அனைத்து உதவிகளையும் கேரள அரசுக்கு மத்திய அரசு வழங்கும் என்று பிரதமர் உறுதியளித்தார்.

கேரளத்தின் வயநாடு மாவட்டத்தில் நிலச்சரிவால் பாதிக்கப்பட்ட பகுதிகளை பிரதமர் நரேந்திர மோடி சனிக்கிழமை (ஆக.10) நேரில் பார்வையிட்டு ஆய்வு செய்தார். பேரழிவை எதிர்கொண்ட சூரல்மலையில் நடந்து சென்று பார்வையிட்ட அவர், நிலச்சரிவில் உயிர் தப்பியவர்களையும் சந்தித்து ஆறுதல் கூறினார்.

மலைப்பாங்கான வயநாடு மாவட்டத்தில் தொடர் கனமழை காரணமாக கடந்த ஜூலை 30-ஆம் தேதி பெரும் நிலச்சரிவுகள் ஏற்பட்டன. இதில் முண்டக்கை, சூரல்மலை, அட்டமலை, புஞ்சிரிமட்டம் போன்ற மலைக் கிராமங்கள் உருக்குலைந்தன. வீடுகள் புதையுண்டதோடு, சாலைகள், பாலங்கள் அடித்துச் செல்லப்பட்டன. 400-க்கும் மேற்பட்டோர் உயிரிழந்த இந்த நிலச்சரிவு, கேரளத்தில் மிக மோசமான இயற்கைப் பேரழிவுகளில் ஒன்றாகக் கருதப்படுகிறது.

பிரதமர் ஆய்வு: இந்நிலையில், வயநாட்டுக்கு சனிக்கிழமை வந்த பிரதமர் மோடி, நிலச்சரிவால் பாதிக்கப்பட்ட பகுதிகளை நேரில் ஆய்வு செய்தார். இதையொட்டி, கண்ணூர் விமான நிலையத்தில் வந்திறங்கிய அவரை, கேரள ஆளுநர் ஆரிஃப் முகமது கான், முதல்வர் பினராயி விஜயன், மத்திய இணையமைச்சர் சுரேஷ் கோபி ஆகியோர் வரவேற்றனர். பின்னர் விமானப் படை ஹெலிகாப்டர் மூலம் வயநாடு சென்ற பிரதமர், நிலச்சரிவால் பாதிக்கப்பட்ட பகுதிகளை வான் வழியாக பார்வையிட்டார். கேரள ஆளுநர், முதல்வர், மத்திய அமைச்சர் ஆகியோரும் அவருடன் சென்றனர்.