நெடுஞ்சாலைத் துறையில் 180 பேர் பணி நியமனம்

நெடுஞ்சாலைத் துறைக்கு புதிதாக தேர்வு செய்யப்பட்டுள்ள 180 பேருக்கு பணி நியமன உத்தரவுகளை முதல்வர் மு.க.ஸ்டாலின் வழங்கினாா்.

இதற்கான நிகழ்ச்சி தலைமைச் செயலகத்தில் புதன்கிழமை நடைபெற்றது.

தமிழக அரசு வெளியிட்ட செய்திக் குறிப்பு: திமுக தலைமையிலான அரசு பொறுப்பேற்றது முதல் இதுவரை நெடுஞ்சாலைத் துறைக்கு 523 பேர் நேரடி முறையிலும் 108 பேர் கருணை அடிப்படையிலும் பணி நியமனம் செய்யப்பட்டுள்ளனா். அதன் தொடர்ச்சியாக, அரசுப் பணியாளர் தேர்வாணையம் மூலம் உதவியாளர் பணியிடத்துக்கு தேர்வு செய்யப்பட்டுள்ள 180 பேருக்கு பணிநியமன உத்தரவுகளை தலைமைச் செயலகத்தில் முதல்வர் மு.க.ஸ்டாலின் புதன்கிழமை வழங்கினாா்.

இந்த நிகழ்ச்சியில், பொதுப்பணிகள், நெடுஞ்சாலைகள் மற்றும் சிறுதுறைமுகங்கள் துறை அமைச்சர் எ.வ.வேலு, தலைமைச் செயலர் சிவ்தாஸ் மீனா, நெடுஞ்சாலைகள் துறையின் செயலர் ஆர்.செல்வராஜ் உள்பட பலர் பங்கேற்றனா்.