தமிழகத்தில் செயற்கை நுண்ணறிவு ஆய்வகங்கள்

தமிழகத்தில் செயற்கை நுண்ணறிவு ஆய்வகங்களை அமைப்பதற்குப் கூகுள் நிறுவனத்துடன் தமிழக அரசு ஒப்பந்தம் மேற் கொண்டது.

அமெரிக்காவில் முதல்வர் மு.க.ஸ்டாலின் முன்னிலையில் இதற்கான புரிந்துணர்வு ஒப்பந்தம் வெள்ளிக்கிழமையில் கையொப்பமானது.

தமிழகத்துக்கு தொழில் முதலீடுகளை ஈர்ப்பதற்காக முதல்வர் மு.க.ஸ்டாலின் அமெரிக்கா சென்றுள்ளார். சான் பிரான்சிஸ்கோ நகரில் நடந்த முதலீட்டாளர்கள் மாநாட்டில் 6 அமெரிக்க நிறுவனங்களுடன் ரூ.900 கோடி மதிப்பிலான முதலீடுகளை ஈர்க்கும் வகையில் ஒப்பந்தங்கள் மேற்கொள்ளப்பட்டன.

அதன் தொடர்ச்சியாக, முதல்வர் மு.க.ஸ்டாலின் கலிஃபோர்னியா சென்று, ஆப்பிள், கூகுள், மைக்ரோசாஃப்ட் ஆகிய நிறுவனங்களின் உயர் அதிகாரிகளை சந்தித்து தமிழகத்தில் தொழில் முதலீடுகளை மேற்கொள்ள அழைப்பு விடுத்தார்.

ஆப்பிள் நிறுவனம்: ஆப்பிள் நிறுவனத்தின் கார்ப்பரேட் தலைமையகம் கலிஃபோர்னியாவின் குபெர்டினோவில் அமைந்துள்ளது. 27 நாடுகளில் 530 உலகளாவிய விற்பனை நிலையங்களுடன் செயல்பட்டு வரும் இந்த நிறுவனம் பார்சூன் 500 நிறுவனங்களில் ஒன்றாகும். தமிழகத்தில் அமைந்துள்ள ஃப்ளெக்ஸ்ட்ரானிக்ஸ், ஹான் ஹய் (ஃபாக்ஸ்கான்), பெகட்ரான், டாடா எலக்ட்ரானிக்ஸ் ஆகிய நிறுவனங்கள் ஆப்பிள் நிறுவனத்துடன் இணைந்து செயல்பட்டு வருகின்றன.