சென்னையில் ஃபார்முலா 4 கார் பந்தயம்: அனுமதி பெறுவதில் நீடித்த இழுபறி

சென்னையில் சனிக்கிழமை மழை பெய்ததைக் காரணமாக, ஃபார்முலா 4 கார் பந்தயம் நடத்துவதற்கான 'எப்ஐஏ' சான்றிதழ் பெறுவதில் இழுபறி நிலை நீடித்தது.

மாலையில் சான்றிதழ் கிடைத்ததையடுத்து, இரவு பயிற்சிப் போட்டிகள் தொடங்கின.

சென்னையில் ஃபார்முலா 4 கார் பந்தயம் சனிக்கிழமை தொடங்கி ஞாயிற்றுக்கிழமை நிறைவுபெறுகிறது. தீவுத்திடலை சுற்றியுள்ள 3.5 கி.மீ. தொலைவு சாலையில், இரவு நேர போட்டியாக நடைபெறுகிறது. இதில், 19 திருப்பங்கள், அதிவேக நேர் வழிகள் உடன் பந்தய பாதை அமைந்துள்ளது. இதை தமிழ்நாடு விளையாட்டு மேம்பாட்டு ஆணையமும், ரேசிங் புரோமோட்டர்ஸ் என்ற தனியார் அமைப்பும் இணைந்து நடத்துகின்றன. இந்தப் போட்டியை 9 ஆயிரம் பேர் பார்க்கவுள்ளனர்.