உ.பி.யில் விரைவு ரயிலை கவிழ்க்க சதி: என்ஐஏ விசாரணை

உத்தர பிரதேச மாநிலத்தில் தண்டவாளத்தில் சமையல் எரிவாயு சிலிண்டர், பெட்ரோல் நிரம்பிய பாட்டில் ஆகியவை வைக்கப்பட்டிருந்த நிலையில், காளிந்தி விரைவு ரயிலை கவிழ்க்க ஐ.எஸ். பயங்கரவாதிகளின் சதி நடைபெற்றதா என சந்தேகம் எழுந்துள்ளது.

இந்தச் சம்பவம் தொடர்பாக தேசிய புலனாய்வு முகமை (என்ஐஏ) விசாரணையைத் தொடங்கியுள்ளது.

உத்தர பிரதேச மாநிலம் கான்பூர் அருகே பிவானி}பிரயாக்ராஜ் இடையே காளிந்தி விரைவு ரயில் ஞாயிற்றுக்கிழமை இரவு சென்று கொண்டிருந்தது. அப்போது தண்டவாளத்தில் சமையல் எரிவாயு சிலிண்டர் வைக்கப்பட்டிருந்ததை கவனித்த அந்த ரயிலின் ஓட்டுநர் அவசரமாக பிரேக்கை இயக்கி ரயிலை நிறுத்த முயன்றார். எனினும் ரயில் நிற்பதற்கு முன்பு அந்த சிலிண்டரின் மீது மோதியது. இதில் தண்டவாளத்தைவிட்டு அந்த சிலிண்டர் தூக்கியெறியப்பட்டது.

இந்தச் சம்பவம் தொடர்பாக இரவு 8.20 மணிக்கு தகவல் கிடைத்ததும் அந்த இடத்துக்கு ரயில்வே உயர் அதிகாரிகள் விரைந்து சென்று விசாரணை நடத்தினர். தடயவியல் நிபுணர்களும் அங்கு சென்றனர். ரயில்வே பாதுகாப்புப் படை இதுகுறித்து விசாரணை நடத்தி வருகிறது.