கொல்கத்தா காவல் ஆணையர் நீக்கம்: முதல்வர் மம்தா அதிரடி

தொடர்போராட்டத்தில் ஈடுபட்டுள்ள இளம் மருத்துவர்களின் கோரிக்கையை ஏற்று கொல்கத்தா காவல் ஆணையரை நீக்க மேற்கு வங்க முதல்வா் மம்தா பானர்ஜி திங்கள்கிழமை ஒப்புக்கொண்டார்.

மேலும், மேற்கு வங்க மருத்துவப் பணிகள் இயக்குநர் மற்றும் மருத்துவக் கல்வி இயக்குநரையும் மாற்றவும் மாநில அரசு முடிவு செய்துள்ளது. அதன்படி, பேச்சுவார்த்தையின்போது போராட்ட மருத்துவர்கள் முன்வைத்த 5 கோரிக்கைகளில் மூன்றை அரசு ஏற்றுக்கொண்டது.

இருந்தபோதும், ‘முதல்வா் மம்தா அளித்த வாக்குறுதிகள் நிறைவேற்றப்படும் வரை போராட்டம் தொடரும்’ என்று பேச்சுவார்த்தைக்குப் பிறகு மருத்துவர்கள் தெரிவித்தனர்.

கடந்த மாதம் மேற்கு வங்க மாநிலம், கொல்கத்தாவில் உள்ள அரசு மருத்துவக் கல்லூரி மருத்துவமனையில் முதுநிலை பெண் பயிற்சி மருத்துவவர் ஒருவா், பாலியல் வன்கொடுமை செய்து கொல்லப்பட்டார். இது தொடர்பாக காவல் துறைக்கு உதவும் தன்னார்வலராகப் பணியாற்றி வந்த சஞ்சய் ராய் என்பவர் கைது செய்யப்பட்டார். இந்த வழக்கை சிபிஐ விசாரித்து வருகிறது.

கொல்லப்பட்ட பெண் மருத்துவருக்கு நீதி கேட்டு, மேற்கு வங்க அரசு மருத்துவமனைகளில் பணியாற்றும் இளநிலை மருத்துவர்கள் ஒரு மாதத்துக்கும் மேலாக பணி புறக்கணிப்புப் போராட்டத்தில் ஈடுபட்டுள்ளனர். இதனால் நோயாளிகள் அவதியடைந்துள்ளனர்.

இந்நிலையில், பெண் மருத்துவர் கொல்லப்பட்ட சம்பவத்தை தாமாக முன்வந்து விசாரித்துவரும் உச்சநீதிமன்றம், மருத்துவர்கள் போராட்டத்தைக் கைவிட்டு செப்.10-ஆம் தேதி மாலை 5 மணிக்குள் பணிக்குத் திரும்ப வேண்டும் என்று உத்தரவிட்டது. எனினும், மருத்துவர்கள் தொடர்ந்தும் போராட்டத்தில் ஈடுபட்டுள்ளனர்.