இஸ்ரேல் தாக்குதல்: லெபனானில் 356 பேர் உயிரிழப்பு

1,246 பேர் காயம்

லெபனானில் இஸ்ரேல் திங்கள்கிழமை மேற்கொண்ட வான்வழித் தாக்குதலில் 24 சிறார்கள், 42 பெண்கள் உள்பட 356 பேர் உயிரிழந்தனர்; 1,246 பேர் காயமடைந்தனர்.

லெபனானில் இஸ்ரேல் இது வரை நடத்திய தாக்குதல்களிலேயே இதுதான் கடுமையான தாக்குதலாகும்.

பாலஸ்தீனத்தின் காஸா முனையில் இஸ்ரேலுக்கும் ஹமாஸ் படையினருக்கும் இடையிலான போர் 11 மாதங்களுக்குமேலாக நடைபெற்று வருகிறது.

அதேவேளையில் லெபனானும் எல்லையைப்பகிர்ந்து வரும் நிலையில், ஹமாஸ் படையினருக்கு ஆதரவாக லெபனானில் உள்ள ஈரான் ஆதரவு பெற்ற ஹிஸ் புல்லா கிளர்ச்சியாளர்கள், இஸ்ரேலின் எல்லைப் பகுதிகள் மீது தாக்குதல் மேற்கொண்டு வருகின்றனர்.

எல்லையில் இஸ்ரேலும், ஹிஸ் புல்லாக்களும் நாள்தோறும் மோதலில் ஈடுபட்டு வருவதால், அங்கு வசிக்கும் இரு நாடுகளைச் சேர்ந்த ஆயிரக்கணக்கான மக்கள் இடம்பெயர்ந்துள்ளனர். நூற்றுக்கணக்கான பல லெபனான் மக்கள் உயிரிழந்துள்ளனர்.

இந்நிலையில், கடந்த ஜூலையில் இஸ்ரேல் ராணுவம் மேற்கொண்ட தாக்குதலில் லெபனானில் ஹிஸ் புல்லா கிளர்ச்சியாளர்களின் மூத்த தளபதி ஃபுவாத் ஷுகர் உயிரிழந்தார். இதேபோல ஈரானில் ஹமாஸ் அமைப்பின் தலைவரான இஸ்மாயில் ஹனீயேவும் கொல்லப்பட்டார். அவர் கொல்லப்பட்டதற்கு இஸ்ரேல் நேரடியாகப் பொறுப் பேற்கவில்லை. ஆனால், அவரை இஸ்ரேல்தான்கொன்றது என்று நம்பப்படுகிறது. இருவரின் கொலைக் குப்பழிக்குப் பழியாக இஸ்ரேலுக்கு பதிலடி அளிக்கப்படும் என்று ஹிஸ் புல்லாக்கள் எச்சரித்திருந்தனர்.

இஸ்ரேல் மீது ஹிஸ்புல்லாக்களும், லெபனான் மீது இஸ்ரேலும் தொடர்ந்து தாக்குதல் நடத்தி வரும் நிலையில், கடந்த வாரம் லெபனானில் பேஜர் கருவிகள் திடீரென வெடித்துச் சிதறின. இந்த சம்பவம் நடைபெற்ற மறுநாள், அந்நாட்டில் வாக்கி டாக்கிகள், சூரிய ஒளி மின்சார கருவிகள் வெடித்துச் சிதறின.

இந்தத் தாக்குதல்களில் ஹிஸ்புல்லா கிளர்ச்சியாளர்கள் உள்பட 39 பேர் உயிரிழந்தனர். சுமார் 3,000 பேர் காயமடைந்தனர்.

தொழில்நுட்ப ரீதியில் இந்த நூதன தாக்குதல்களை இஸ்ரேல் தான் நடத்தியது என்று லெபனான் கூறினாலும், அதுகுறித்து கருத்து தெரிவிக்க இஸ்ரேல் மறுத்துவிட்டது. அதேவேளையில், அந்த குற்றச்சாட்டை இஸ்ரேல் மறுக்கவும் இல்லை.