கல்வித் திட்ட நிலுவை நிதியை விடுவிக்க வேண்டும்

தமிழகத்தில் கல்வி, மெட்ரோ ரயில் திட்டங்களுக்கு நிலுவை நிதியை உடனடியாக விடுவிக்க வேண்டும் என பிரதமர் நரேந்திர மோடியை தில்லியில் வெள்ளிக்கிழமை சந்தித்து முதல்வர் மு.க.ஸ்டாலின் வலியுறுத்தினார்.

நடுக்கடலில் தாக்கப்படும் தமிழகம் மீனவர்களின் பிரச்னைக்கு நிரந்தரத் தீர்வு காண வேண்டும் எனவும் வேண்டுகோள் விடுத்தார்.

முதல்வர் மு.க.ஸ்டாலின் சென்னையிலிருந்து விமானம் மூலம் வியாழக்கிழமை இரவு தில்லிக்கு வந்தார். பிரதமர் மோடியை வெள்ளிக்கிழமை சந்தித்து மூன்று முக்கியக் கோரிக்கைகள் தொடர்பாக மனு அளித்தார்.

கல்வி நிதி கோரிக்கை: மனுவில் குறிப்பிடப்பட்டுள்ள விவரம் வருமாறு: தமிழகத்தில் ஒருங்கிணைந்த கல்வித் திட்டத்தை (சமக்ர சிக்ஷா) 60:40 விகிதாசாரப்படி செயல்படுத்த மத்திய அரசும் தமிழக அரசும் வழங்கும் நிதிப் பங்களிப்பின்பேரில் திட்ட அனுமதி வாரியம் (பிஏபி) ஆண்டுதோறும் அனுமதி தரும். நிகழ் நிதியாண்டில் தமிழகத்துக்கு ஏற்கெனவே தரவேண்டிய ரூ. 3,585.99 கோடியுடன் சேர்த்து ரூ. 4,305.66 கோடியை ஒதுக்க பிஏபி அனுமதி அளித்தது. இதில் மத்திய அரசு வழங்க வேண்டிய தொகை ரூ.2,151.99 கோடி. இதில் முதல் தவணையான 25 சதவீதத்தை விடுவிக்கக் கோரியும் இதுவரை நடவடிக்கை எடுக்கவில்லை.

தேசிய கல்விக் கொள்கை 2020ஐ செயல்படுத்த அழுத்தம் தரும் பிஎம் ஸ்ரீ திட்ட புரிந்துணர்வு உடன்படிக்கையில் தமிழகம் கையொப்பமிடாததே இதற்குக் காரணம். அதன் அம்சங்களில் காலை உணவுத் திட்டம் உள்பட பல ஏற்கெனவே செயல்படுத்தப்படுகிறது.