'மெரீனா உயிரிழப்பு சம்பவத்தை அரசியலாக்க வேண்டாம்'

மெரீனா உயிரிழப்பு சம்பவத்தை யாரும் அரசியலாக்க வேண்டாம் என்று மக்கள் நல்வாழ்வுத் துறை அமைச்சர் மா.சுப்பிரமணியன் வேண்டுகோள் விடுத்தார்.

சென்னையில் அவர் திங்கள்கிழமை கூறியதாவது: மெரீனா வான் சாகச நிகழ்வுக்காக இந்திய விமானப்படை கோரிய அனைத்து வசதிகளையும் தமிழக அரசு செய்து கொடுத்தது.

இந்திய ராணுவம் மற்றும் தமிழக அரசு சார்பில் பல்வேறு மருத்துவ குழுக்கள் பணியமர்த்தப்பட்டு இருந்தன.

40 ஆம்புலன்ஸ் வாகனங்கள், 1,000-க்கும் மேற்பட்ட மருத்துவப் பணியாளர்கள் தயார்நிலையில் இருந்தனர். விமானப்படை சார்பில் 100 படுக்கைகள் தயார்நிலையில் வைக்குமாறு வலியுறுத்தப்பட்டிருந்த நிலையில், அதை விட பல மடங்கு அதிகமாகவே படுக்கைகள் தயாராக வைக்கப்பட்டன.