2026-இல் முழு செயல்பாட்டில் மதுரை எய்ம்ஸ்!

மத்திய அமைச்சர் அனுப்ரியா படேல் சிறப்புப் பேட்டி

- ம.ஆ.பரணிதரன்

2026-இல் மதுரையில் அகில இந்திய மருத்துவ அறிவியல் கல்வி நிறுவனம் (எய்ம்ஸ்) அதன் சொந்தக் கட்டடத்தில் முழுமையாக செயல்பாட்டுக்கு வரும் என்று மத்திய சுகாதாரம் மற்றும் குடும்ப நலத்துறை இணை அமைச்சர் அனுப்ரியா படேல் தெரிவித்துள்ளார்.

மத்தியில் ஆளும் பாரதிய ஜனதா கட்சி தலைமையிலான தேசிய ஜனநாயக கூட்டணியில் முக்கிய கூட்டணி கட்சியாக அப்னா தளம் (சோனிலால்) விளங்குகிறது. அதன் தலைவரான அனுப்ரியா படேல் (44), மூன்றாவது முறையாக உத்தர பிரதேசத்தின் மிர்ஸாபூர் தொகுதியில் இருந்து மக்களவைக்குத் தேர்வானதுடன் பிரதமர் நரேந்திர மோடி அமைச்சரவையில் மூன்றாவது முறையாகவும் இடம்பிடித்துள்ளார்.

மத்திய சுகாதாரம், குடும்ப நலத்துறை மற்றும் ரசாயனம், உரத்துறை இணை அமைச்சராக உள்ள அவர், மதுரை எய்ம்ஸ் செயல்பாடு, திமுகவின் திராவிட மாடல், நீட் தேர்வு, ஜாதிய அரசியல் போன்றவை குறித்து டில்லியில் தினமணி நிருபரிடம் பேசினார். அவரது நேர்காணலில் இருந்து...

உத்தர பிரதேசத்தில் பாஜக தலைமையிலான தேசிய ஜனநாயக கூட்டணி பின்னடைவைச் சந்தித்ததற்கு என்ன காரணம் என்று நினைக்கிறீர்கள்?

தேசிய ஜனநாயக கூட்டணி ஆட்சி தொடர்ந்தால் இடஒதுக்கீடு முறை ஒழிக்கப்படும், அரசமைப்புச் சட்டம் திருத்தப்படும் என்பன போன்ற எதிர்க்கட்சிகளின் பொய் பரப்புரை வலையில் பெரும்பகுதி வாக்காளர்கள், பட்டியலினம், பழங்குடியினர், விளிம்புநிலை சமூகத்தினர் விழுந்தனர். அது தேர்தலில் தாக்கத்தை ஏற்படுத்தியது.

மக்களவைத் தேர்தலில் தொடர்ந்து 3 முறை எம்.பி. ஆன பிறகும் கேபினட் அந்தஸ்தின்றி இணை அமைச்சராக தொடர்வது வருத்தம் தரவில்லையா?

அமைச்சரவையைப் பொருத்த வரை யாருக்கு என்ன பதவி, அந்தஸ்து போன்றவற்றை தீர்மானிப்பது பிரதமரின் உரிமை. மோடி 3.0 அரசில் நானும் ஒரு அங்கமாக இருப்பதில் எனக்கு மகிழ்ச்சியே.

நீட் வினாத்தாள் கசிவு குளறுபடிகள், விளிம்புநிலை சமூக மாணவர்களை, குறிப்பாக தென் மாநிலத்தவர்களை பாதிப்பதாக குற்றஞ்சாட்டப்படுகிறதே. ஒரு அமைச்சராகவும் அரசியல் தலைவராகவும் உங்கள் பதில்?