மாற்று நில முறைகேடு வழக்கு கர்நாடக முதல்வர் சித்தராமையாவிடம் லோக் ஆயுக்த அதிகாரிகள் விசாரணை

மைசூரு, நவ. 6: மாற்று நில முறைகேடு வழக்கில் குற்றஞ்சாட்டப்பட்ட முதல் நபராக சேர்க்கப்பட்டுள்ள கர்நாடக முதல்வர் சித்தராமையாவிடம் லோக் ஆயுக்த போலீஸார் புதன்கிழமை விசாரணை நடத்தினர்.

முதல்வர் சித்தராமையாவின் மனைவி பார்வதிக்கு மைசூரு நகர வளர்ச்சி ஆணையம் மாற்று நிலம் ஒதுக்கியதில் முறைகேடு நடந்துள்ளதாக எழுந்துள்ள குற்றச்சாட்டு தொடர்பாக, சித்தராமையா உள்ளிட்டோர் மீது வழக்குப் பதிந்து லோக் ஆயுக்த விசாரணை நடத்தி வருகிறது.

தனது அதிகாரத்தை துஷ்பிரயோகம் செய்து தனது மனைவி பார்வதிக்கு மாற்று நிலமாக 14 வீட்டு மனைகளை பெற்றுத் தந்ததாக சித்தராமையா மீது குற்றஞ்சாட்டப்பட்டுள்ளது.

இதனிடையே, பணப் பதுக்கல் தொடர்பாக முதல்வர் சித்தராமையா மீது அமலாக்கத் துறை வழக்குப் பதிந்து விசாரித்து வருகிறது.

இந்நிலையில், லோக் ஆயுக்த விசாரித்து வரும் முதல்வர் சித்தராமையா மீதான வழக்கை சிபிஐ விசாரணைக்கு ஒப்படைக்கக் கோரி சமூக செயற்பாட்டாளர் ஸ்நேகமயி கிருஷ்ணா தாக்கல் செய்திருந்த ரிட் மனுவை நவ. 5-ஆம் தேதி விசாரித்த கர்நாடக உயர்நீதிமன்ற நீதிபதி எம்.நாகபிரசன்னா, இது தொடர்பாக விளக்கம் கேட்டு முதல்வர் சித்தராமையா, அவரது மனைவி பார்வதி, மைத்துனர் மல்லிகார்ஜுனசாமி ஆகியோருக்கு நோட்டீஸ் அனுப்ப உத்தரவிட்டுள்ளார்.