உலகத் தரவரிசையில் 2-ஆவது இடத்துக்கு முன்னேறினார் அர்ஜுன்

சென்னை கிராண்ட்மாஸ்டர்ஸ் செஸ் போட்டியின் 3-ஆவது சுற்றில் அர்ஜுன் எரிகைசி வென்று, உலகத் தரவரிசையில் 2-ஆவது இடத்துக்கு முன்னேறினார்.

இப்போட்டியின் மூன்றாவது நாளான வியாழக்கிழமை 3-ஆவது சுற்று ஆட்டங்கள் நடைபெற்றன. மாஸ்டர்ஸ் பிரிவில் முதல் போர்டில் ஈரானின் அமீன் தபதாபேயி, பிரான்ஸின் மாக்சிம் வாச்சியர் மோதிய ஆட்டத்தில் அமீன் தபதாபேயி 38-ஆவது நகர்த்தலின் போது வெற்றியை வசப்படுத்தினார்.

2-வது போர்டில் இந்தியாவின் விதித் குஜராத்தி- சகவீரர் அரவிந்த் சிதம்பரத்தை எதிர்கொண்டார். இந்த ஆட்டம் 48-ஆவது நகர்த்தலின் போது டிராவில் முடிவடைந்தது.

3-வது போர்டில் அமெரிக்காவின் லெவோன் ஆரோனியன், ஈரானின் பர்ஹாம் மக்சூட்லூ மோதினர். இதில் 46-ஆவது நகர்த்தலின்போது ஆரோனியன் வெற்றி பெற்றார்.

4-வது போர்டில் இந்தியாவின் அர்ஜுன் எரிகைசி, செர்பியாவின் அலெக்ஸி சரானா மோதிய ஆட்டத்தில் 37-ஆவது நகர்த்தலின்போது அர்ஜுன் எரிகைசி வெற்றியை வசப்படுத்தினார். இந்த வெற்றியின் மூலம் லைவ் ரேட்டிங்கில் அர்ஜுன் எரிகைசி 2805.8 புள்ளிகளுடன் உலகத் தரவரிசையில் 2-வது இடத்துக்கு முன்னேறினார்.