ஜாதிவாரி கணக்கெடுப்பு, புற்றுநோய் தடுப்பூசி இலவசம்

மதமாற்றத்தை தடுக்க கடுமையான சட்டம்: பாஜக வாக்குறுதி

ஜாதிவாரி கணக்கெடுப்பு, சிறுமிகளுக்கு இலவச கருப்பைவாய் புற்றுநோய் தடுப்பூசி, மாதவிடாய் காலத்தில் பெண்களுக்கு இரு நாள்கள் விருப்ப விடுமுறை உள்ளிட்ட வாக்குறுதிகள் அடங்கிய தேர்தல் அறிக்கையை காங்கிரஸ்-சிவசேனை (உத்தவ்)- தேசியவாத காங்கிரஸ் (சரத் பவார்) உள்ளிட்ட கட்சிகளின் மகா விகாஸ் அகாடி கூட்டணி ஞாயிற்றுக்கிழமை வெளியிட்டது.

மேலும், பெண்களுக்கு உதவித்தொகையாக தற்போது மாதம் ரூ.1,500 வழங்கப்பட்டு வரும் நிலையில் அதை உயர்த்தி ரூ.3,000-ஆக வழங்கப்படும் எனவும் அறிக்கையில் தெரிவிக்கப்பட்டது.

மகாராஷ்டிரத்தில் வரும் 20-ஆம் தேதி பேரவைத் தேர்தல் நடைபெறவுள்ள நிலையில் தேர்தல் அறிக்கையை காங்கிரஸ் தேசியத் தலைவர் மல்லிகார்ஜுன கார்கே வெளியிட்டார். அவருடன் தேசியவாத காங்கிரஸ் கட்சியின் செயல் தலைவர் சுப்ரியா சுலே மற்றும் சிவசேனை (உத்தவ்) எம்.பி. சஞ்சய் ரௌத் ஆகியோர் உடனிருந்தனர்.

பெண்கள், குழந்தைகள் பாதுகாப்பு: தேர்தல் அறிக்கையில் கூறப்பட்டுள்ளதாவது: பெண்கள் மற்றும் குழந்தைகளின் நலனுக்கென தனி அமைச்சகம் அமைக்கப்படும். பொருளாதார ரீதியாக பெண்களை மேம்படுத்தும் நோக்கில் சுய உதவிக் குழுக்களுக்கென தனித் துறை உருவாக்கப்படும். ஆண்டுக்கு 6 சமையல் எரிவாயு உருளைகள் தலா ரூ.500 என்ற விலையில் பெண்களுக்கு விநியோகிக்கப்படும்.