ஏற்ற, இறக்கத்தில் பங்குச்சந்தை: சென்செக்ஸ், நிஃப்டி தடுமாற்றம்

இந்த வாரத்தின் முதல் வர்த்தக தினமான திங்கள்கிழமை பங்குச்சந்தை ஏற்ற, இறக்கத்தில் இருந்தது.

இதைத் தொடர்ந்து, மும்பை பங்குச்சந்தைக் குறியீட்டு எண்ணான சென்செக்ஸ் பெரிய அளவில் மாற்றமின்றி 10 புள்ளிகள் மட்டும் உயர்ந்து நிலைபெற்றது.

உலகளாவிய சந்தைக் குறிப்புகள் நேர்மறையாக இருந்தன. இருப்பினும், உள்நாட்டுச் சந்தை சரிவுடன் தொடங்கி கீழே சென்றது. பின்னர், முன்னணி நிறுவனப் பங்குகளை வாங்குவதற்கு கிடைத்த வரவேற்பால் அது மேலே சென்றது.

ஆனால், அந்நிய நிறுவன முதலீட்டாளர்கள் தொடர்ந்து பங்குகளை விற்று முதலீடுகளை வாபஸ் பெற்று வருவதும், கார்ப்பரேட் நிறுவனங்களின் காலாண்டு முடிவுகள் சந்தை எதிர்பார்ப்பை பூர்த்தி செய்யாததாலும் உச்சத்தில் லாபப் பதிவு வந்தது. குறிப்பாக எஃப்எம்சிஜி, மீடியா, மெட்டல், ஃபார்மா, ஹெல்த்கேர், ஆயில் & காஸ் நிறுவனப் பங்குகள் விற்பனையை எதிர்கொண்டன.