பாம்பன் பாலத்தில் மீனவர்கள் மறியல்

இலங்கை சிறையில் உள்ள மீனவர்கள், விசைப்படகுகளை மீட்க மத்திய, மாநில அரசுகள் உடனடி நடவடிக்கை எடுக்கக்கோரி, அனைத்து விசைப்படகு, நாட்டுப்படகு மீனவ சங்கம் சார்பில், பாம்பன் சாலைப் பாலத்தில் செவ்வாய்க்கிழமை மறியல் போராட்டம் நடைபெற்றது.

இதனால், 3 மணி நேரம் போக்குவரத்து பாதிக்கப்பட்டது.

ராமநாதபுரம் மாவட்டம், ராமேசுவரம், பாம்பன், மண்டபம் உள்ளிட்ட பகுதிகளிலிருந்து கடலுக்குள் மீன்பிடிக்கச் செல்லும் மீனவர்களை இலங்கைக் கடற்படையினர் கைது செய்யும் நிகழ்வு தொடர்ந்து நடைபெறுகிறது. மேலும், பறிமுதல் செய்யப்படும் படகுகளுக்கு அபராதம் விதிப்பது உள்ளிட்ட நடவடிக்கைகளை இலங்கை அரசு மேற்கொண்டு வருகிறது.

இந்த நிலையில், கடந்த சனிக்கிழமை ராமேசுவரத்திலிருந்து கடலுக்குள் மீன்பிடிக்கச் சென்ற போது, 3 விசைப்படகுகளுடன் 23 மீனவர்களை இலங்கைக் கடற்படையினர் கைது செய்தனர். இதைக் கண்டித்தும், படகுகள், மீனவர்களை விடுவிக்க மத்திய, மாநில அரசுகள் உடனடி நடவடிக்கை எடுக்க வலியுறுத்தியும் பாம்பன் சாலைப் பாலத்தில் மறியல் போராட்டத்தில் ஈடுபடுவது என அனைத்து விசைப்படகு மீனவ சங்கக் கூட்டத்தில் தீர்மானம் நிறைவேற்றப்பட்டது.