கல்வி, சுகாதாரம், வேளாண்மைக்கு முக்கியத்துவம்

முன்னாள் குடியரசு துணைத் தலைவர் வெங்கையா நாயுடு வலியுறுத்தல்

இந்தியாவில் 56 சதவீத மக்கள் வேளாண்மை சார்ந்தும், 18 சதவீதம் பேர் வறுமை கோட்டுக்கு கீழே வாழும் நிலையில் கல்வி, சுகாதாரம், வேளாண்மைக்கு முக்கியத்துவம் அளிக்க வேண்டியது அவசியம் என்று முன்னாள் குடியரசு துணைத் தலைவர் வெங்கையா நாயுடு வலியுறுத்தினார். விஐடி பல்கலைக்கழகத்தின் 40-ஆவது ஆண்டு மாணிக்க விழா மற்றும் புதிதாக கட்டப்பட்டுள்ள ராஜம்மாள் கோவிந்தசாமி-ஊழியர் குடியிருப்பு, சரோஜினி நாயுடு பிளாக் (மாணவியர் விடுதி) கட்டடங்கள் திறப்பு விழா ஆகியவை வேலூர் விஐடி அண்ணா அரங்கத்தில் செவ்வாய்க்கிழமை நடைபெற்றன.

சிறப்பு விருந்தினராக முன்னாள் குடியரசு துணைத் தலைவர் வெங்கையா நாயுடு பங்கேற்று மாணிக்க விழா அடிக்கல், புதிய கட்டடங்களை திறந்து வைத்துப் பேசியது: விஐடி பல்கலைக்கழகத்தின் இத்தகைய வளர்ச்சிக்கு வேந்தர் கோ.விசுவநாதனின் யோசனை, அனுபவம், திட்டமிடல்தான் முக்கிய காரணமாகும். அவர் இளைய தலைமுறையினருக்கு கல்வியுடன் தன்னம்பிக்கையும் அளித்து வருகிறார். நான்கு தலைமுறைகளை கண்ட அவர், அடுத்த தலைமுறையினருக்கு ஒழுக்கம், அர்ப்பணிப்பு, கடின உழைப்பு ஆகிய மூன்றின் உதாரணமாக திகழ்கிறார்.