மருத்துவருக்கு கத்திக்குத்து: ஆளுநர், தலைவர்கள் கண்டனம்

கிண்டி கலைஞர் உயர் சிறப்பு மருத்துவமனையில் மருத்துவரை இளைஞர் கத்தியால் குத்திய சம்பவத்துக்கு மத்திய இணை அமைச்சர் எல். முருகன், அதிமுக பொதுச் செயலாளர் எடப்பாடி பழனிசாமி உள்ளிட்ட தலைவர்கள் கண்டனம் தெரிவித்துள்ளனர்.

ஆளுநர் ஆர்.என். ரவி: மருத்துவர் பாலாஜி மீதான தாக்குதல் அதிர்ச்சியளிப்பதுடன் வன்மையாக கண்டிக்கத்தக்கது. மருத்துவர்களுக்கு எதிரான எந்தவொரு வன்முறையும் ஏற்றுக்கொள்ள முடியாது. மருத்துவர்கள், சுகாதாரத்துறையினரின் பாதுகாப்பை உறுதிப்படுத்த அவசர மற்றும் உடனடி நடவடிக்கைகள் அவசியம். மருத்துவர் பாலாஜி விரைவாக உடல்நலம் பெற வேண்டிக்கொள்கிறேன்.

மத்திய இணை அமைச்சர் எல்.முருகன்: இந்தச் சம்பவம் அரசு மருத்துவமனைகளில் மருத்துவரின் உயிருக்கே உத்தரவாதம் இல்லாததைக் காட்டுகிறது. அரசு மருத்துவர்களுக்கு உரிய பாதுகாப்பு வழங்குவதுடன், நோயாளிகளுக்கு தங்கு தடையின்றி சிகிச்சை வழங்குவதை தமிழக அரசு உறுதிசெய்ய வேண்டும்.

எடப்பாடி பழனிசாமி (அதிமுக): அரசு மருத்துவமனையில் அரசு மருத்துவருக்குக்கூட பாதுகாப்பு இல்லை என்பது, திமுக ஆட்சியின் சட்டம் ஒழுங்கு எவ்வாறு இருக்கிறது என்பதை பட்டவர்த்தனமாகக் காட்டுகிறது.

ஓ.பன்னீர்செல்வம் (முன்னாள் முதல்வர்): அரசு ஊழியர்கள், மருத்துவமனையில் பணிபுரிவோர், காவல் துறையினர் என அனைத்து தரப்பினருக்கும் பாதுகாப்பு இல்லாத அவல நிலை திமுக ஆட்சியில் உள்ளது.