பாம்பன் புதிய ரயில்வே பாலத்தில் பாதுகாப்பு ஆணையர் ஆய்வு

பாம்பன் புதிய ரயில்வே பாலத்தை தென் மண்டல ரயில்வே பாதுகாப்பு ஆணையர் ஏ.எம். சௌத்ரி புதன்கிழமை ஆய்வு செய்தார்.

ராமநாதபுரம் மாவட்டம், மண்டபம்-ராமேசுவரம் தீவை இணைக்கும் வகையில், கடந்த 1914-ஆம் ஆண்டு கப்பல்கள் வந்து செல்லும் வகையில் மீட்டர் கேஜ் ரயில் பாலம் அமைக்கப்பட்டது. இதன்பின்னர், கடந்த 2007-ஆம் ஆண்டு மீட்டர் கேஜ் பாதை அகல ரயில் பாதையாக மாற்றப்பட்டது.

இந்தப் பாலம் நூற்றாண்டைக் கடந்த நிலையில், கப்பல்கள் வந்து செல்வதில் ஏற்படும் இடையூறுகளைக் கருத்தில் கொண்டு, அதன் அருகே புதிய பாலம் கட்ட ரயில்வே அமைச்சகம் அனுமதி வழங்கியது. இதன்படி, கடந்த 2019-ஆம் ஆண்டு ரூ. 550 கோடியில் புதிய ரயில்வே பாலம் கட்டுமானப் பணி தொடங்கப்பட்டு, தற்போது நிறைவடைந்துள்ளது.

இந்தப் பாலம் 2,078 மீ. நீளம், கடல் மட்டத்திலிருந்து 6 மீ. உயரம், 333 கான்கிரீட் அடித்தளங்கள், 101 தூண்கள், 99 இணைப்புகளைக் கொண்டு கட்டப்பட்டுள்ளது.