இலங்கையின் புதிய அமைச்சரவை பொறுப்பேற்பு

ஹரிணி அமரசூரிய மீண்டும் பிரதமர்

இலங்கையில் அமைந்துள்ள புதிய அரசில், 21 உறுப்பினர்கள் அடங்கிய சிறிய அமைச்சரவை திங்கள்கிழமை பொறுப்பேற்றது. பிரதமராக ஹரிணி அமரசூரிய மீண்டும் நியமிக்கப்பட்டுள்ளார்.

பொருளாதார நெருக்கடியில் சிக்கியுள்ள இலங்கையில், வீண் செலவுகளைக் குறைக்கும் வகையில் ஆட்சி முறையில் சீர்திருத்தம் மேற்கொள்வதாக அதிபர் அனுர குமார திசாநாயக தேர்தலுக்கு முன்னரே வாக்குறுதி அளித்திருந்தார். மக்கள் வரிப்பணம் விரயமாவதைத் தடுப்பதற்காக, மிகக் குறைந்த எண்ணிக்கையிலான அமைச்சர்களைக் கொண்ட அரசை அமைப்பதாகவும் அவர் கூறியிருந்தார்.

இந்த நிலையில், நாடாளுமன்றத் தேர்தலுக்குப் பிறகு திங்கள்கிழமை அவர் அறிவித்த அமைச்சரவையில், 21 அமைச்சர்கள் மட்டுமே இடம் பெற்றனர். இதன் மூலம், ஆட்சி முறை சீர்திருத்தம் தொடர்பான தனது வாக்குறுதியை திசாநாயக நிறைவேற்றியுள்ளதாகக் கூறப்படுகிறது.