அணு ஆயுத தாக்குதல்: ரஷியா திடீர் எச்சரிக்கை

அமெரிக்க ஏவுகணைகள்‌ மூலம்‌ உக்ரைன்‌ தாக்குதல்‌ எதிரொலி

மாஸ்கோ, நவ. 19: தொலைதூர பகுதிகளில்தாக்குதல் நடத்தும் 6 அமெரிக்க தயாரிப்பு 'அட்டாக்கம்ஸ்' பலிஸ்டிக் ஏவுகணைகளை, ரஷியாவை நோக்கி உக்ரைன் ஏவியது.

இந்தத் தாக்குதலை தொடர்ந்து அணு ஆயுத தாக்குதலுக்கு எச்சரிக்கை விடுக்கும் வகையில், அதற்கான புதிய கொள்கையில் ரஷிய அதிபர் விளாதிமீர் புதின் செவ்வாய்க்கிழமை கையொப்பமிட்டார்.

நேட்டோ அமைப்பில் அமெரிக்கா, பிரிட்டன், ஜெர்மனி, பிரான்ஸ், கனடா என 32 நாடுகள் உறுப்பினர்களாக இடம்பெற்றுள்ளன. இந்த அமைப்பில் இடம்பெற்றுள்ள நாடுகளின் சுதந்திரம் மற்றும் பாதுகாப்பை காப்பதே தனது நோக்கம் என்று நேட்டோ தெரிவித்துள்ளது.

நேட்டோவில் இணைய உக்ரைன் முடிவு செய்ததற்கு எதிர்ப்புத் தெரிவித்து அந்நாட்டின் மீது கடந்த 2022-ம் ஆண்டு பிப்ரவரி மாதம் ரஷியா போர் தொடுத்தது. இந்தப் போர் 2 ஆண்டுகளுக்கும் மேலாக நீடித்து வருகிறது. இதனால் உக்ரைனில் இருந்து லட்சக்கணக்கான மக்கள் வேறு நாடுகளுக்கு இடம்பெயர்ந்துள்ளனர்.

மேற்கத்திய நாடுகளின் ராணுவ அமைப்பான நேட்டோ, கிழக்கு லகை நோக்கி விஸ்தரித்து வருவதைக் காட்டி, இந்தப் படையெடுப்பை ரஷியா மேற்கொண்டது.

நேட்டோவுக்கு ரஷியா எதிர்ப்பு: நேட்டோவில் உக்ரைன் இணைந்தால், அதன்மூலம் அந்த அமைப்பில் உள்ள படைகள் மற்றும் ராணுவ தளவாடங்கள் தமது எல்லைக்கு அருகிலிருந்து விரைவாக தம் மீது தாக்குதல் நடத்தக்கூடும் என்றும், இதனால் தமது பாதுகாப்புக்கு அச்சுறுத்தல் ஏற்படும் என்றும் ரஷியா கருதுகிறது.

இதுவே நேட்டோ அமைப்பில் உக்ரைன் இணைவதற்கு ரஷியா எதிர்ப்பு தெரிவிப்பதற்கு பிரதான காரணம். அதேவேளையில், ரஷியாவின் எல்லைகளையொட்டி 8 படைக் குழுக்களை அமைத்து தமது ராணுவ பலத்தை நேட்டோ அமைப்பு வலுப்படுத்தியுள்ளது.