விவாதப் பொருளாகும் அரசியல் சாசனம்!

அரசமைப்புச் சட்ட வரைவுப் பணிகள் நிறைவு செய்வதற்கு முன் தினம் அம்பேத்கர் ஆற்றிய உரை இன்றும் பேசுபொருளாக இருக்கிறது. அதில் “இந்தத் தலைமுறையின் கருத்துக்களை வைத்து இந்த அரசியல் சட்டத்தை நாம் உருவாக்குகிறோம். இது வருங்காலத்தில் எவ்வாறு மாறும் அல்லது மாறுபடாது என்று இப்போது கூற முடியாது” என்றார்.

- விஜய் வேந்தர்

இந்திய அரசமைப்புச் சட்ட தினம் ஒவ்வொரு ஆண்டும் நவம்பர் 26-ஆம் தேதி கொண்டாடப்படுகிறது. 2015 முதல் மத்திய அரசு இந்த தினத்தைக் கொண்டாட்ட தினமாக அறிவித்து கொண்டாடுகிறது. இந்திய அரசியலமைப்புச் சட்டத்தை உருவாக்கும் பணி 1946-ஆம் ஆண்டு டிசம்பர் 9-ஆம் தேதி தொடங்கியது. அரசியல் நிர்ணய சபையில் பி.ஆர். அம்பேத்கர் முதலில் இடம் பெறவில்லை. யோகேந்திரநாத் என்பவர் விலகியதால் அம்பேத்கர் இடம்பெற்றார்.

அரசியல் சாசனம் உருவாக்குவது பற்றி அரசியல் நிர்ணய சபையில் 1947-ஆம் ஆண்டு ஆகஸ்ட் 29-ஆம் தேதி தீர்மானம் நிறைவேற்றப்பட்டது. அரசியல் சாசனம் இயற்ற அம்பேத்கர் தலைமையில் ஏழு பேர் கொண்ட அரசியல் சாசன வரைவுக் குழு அமைக்கப்பட்டது. இந்தக் குழுவில் என். கோபாலஸ்வாமி ஐயங்கார், அல்லாடி கிருஷ்ணஸ்வாமி ஐயர், கே.எம்.முன்ஷி, முகமது சாதுல்லா, பி.எல்.மித்தர், டி.பி. கைத்தான் ஆகியோர் இருந்தார்கள். இதில் டி.பி.கைத்தான் காலமானதால் 1948-இல் டி.டி.கிருஷ்ணமாச்சாரி இந்தக் குழுவில் இணைந்தார். இதேபோல் உடல்நிலைகாரணமாக பி.எல்.மித்தர் விலகியதால் என். மாதவ ராவ் அந்தக் குழுவில் இணைந்தார்.

அரசியல் அமைப்புச் சட்ட வரைவுக் குழு 166 முறை கூடி ஆலோசித்தது. இறுதியாக சட்ட வரைவை ஹிந்தி மற்றும் ஆங்கிலத்தில் கையால் எழுதப்பட்ட இரண்டு பிரதிகளைத் தயார் செய்து அதில் இந்த குழு உறுப்பினர்கள் கையொப்பமிட்டார்கள். 1949 நவம்பர் 26-இல் அதிகாரபூர்வமாக அரசியல் சாசனம் ஏற்கப்பட்டது. இந்திய அரசமைப்புச் சட்டம் 1950 ஜனவரி 26-இல் நடைமுறைப்படுத்தப்பட்டது.