திவால் சட்டம்: ரூ.3.55 லட்சம் கோடி கடன்தொகை மீட்பு

திவால் சட்டத்தின் கீழ் கடந்த செப்டம்பர் மாதம் வரை ரூ.3.55 லட்சம் கோடி கடன்தொகை மீட்கப்பட்டதாக மத்திய அரசு திங்கள்கிழமை தெரிவித்தது.

இது தொடர்பாக மக்களவையில் பெருநிறுவனங்கள் விவகாரங்களுக்கான மத்திய இணையமைச்சர் ஹர்ஷ் வர்ஷ் மல்ஹோத்ரா அளித்த எழுத்துப்பூர்வ பதிலில், 'திவால் சட்டம், 2016 (ஐபிசி)-இன் கீழ் கடந்த செப்டம்பர் மாதம் வரை 1,068 வழக்குகளுக்கு தீர்வு காணப்பட்டு மொத்தமாக ரூ.3.55 லட்சம் கோடி கடன்தொகை மீட்கப்பட்டுள்ளது. அதேபோல் திவாலான பெருநிறுவனங்களுக்கான தீர்வு நடைமுறை (சிஐஆர்பி)-இன் கீழ் 1,968 வழக்குகள் உள்ளன. அதில் 1,388 வழக்குகள் 270 நாட்கள் கால அவகாசத்தை தாண்டியுள்ளன' என்றார்.