மூன்றாம் உலகப் போர் வருமா?

இரண்டு உலகப் போர்களால் ஏற்பட்ட அழிவுகள் இன்னும் மறக்கப்படவில்லை. போர் இல்லாத அமைதியான உலகத்தையே மக்கள் விரும்புகின்றனர். ஆனால் போர் ஆயுதங்களைத் தயாரித்து வைத்திருக்கும் வல்லரசு நாடுகள் போரை உருவாக்குகின்றன.

- உதயை மு.வீரையன்

அப்போதுதானே ஆயுதங்களை விற்பனை செய்ய முடியும்?

முதல் உலகப் போர் 1914-ஆம் ஆண்டு ஜூலை 14 அன்று ஹங்கேரி-ஆஸ்திரியா நாடுகள் செர்பியா மீது போர் அறிவித்த போது தொடங்கியது. இது உலக வரலாற்றில் மிகப்பெரிய போர்களில் ஒன்றாகும். இந்த மிருகத்தனமான போரில் 70 லட்சத்துக்கும் அதிகமான பொதுமக்கள் மற்றும் 90 லட்சம் படைவீரர்கள் உயிரிழந்தனர்.

இரண்டாம் உலகப் போர் 1939 முதல் 1945 வரை நேச நாடுகளுக்கும், அச்சு நாடுகளுக்கும் இடையில் நடைபெற்றது. இதில் 30-க்கும் மேற்பட்ட நாடுகளைச் சேர்ந்த 10 கோடிக்கும் மேற்பட்ட ராணுவ வீரர்கள் நேரடியாகப் பங்கேற்றனர். மனித வரலாற்றில் இதுவரை அதிக உயிர் இழப்புகளை ஏற்படுத்திய போராக இரண்டாம் உலகப்போர் திகழ்கிறது. இனப்படுகொலை, பட்டினி, படுகொலைகள் மற்றும் நோய் காரணமாக கோடிக்கணக்கானோர் இறந்தனர்.

இரண்டாம் உலகப்போரானது, உலகின் அரசியல் சார்பு மற்றும் சமூக அமைப்பை மாற்றியது. பன்னாட்டு ஒத்துழைப்பை உருவாக்கவும், எதிர்காலத்தில் போர்களைத் தடுக்கவும் ஐக்கிய நாடுகள் அவை நிறுவப்பட்டது. அதன் பிறகு அமெரிக்க ஐக்கிய நாடும், சோவியத் ஒன்றியமும் எதிரெதிர் வல்லரசுகளாக வளர்ந்து விட்டன.

இப்போது இரண்டு போர்கள் உலகப் போரை நோக்கிப் போகின்றன. ரஷிய-உக்ரைன் போரில் முதன் முறையாகக் கண்டம் விட்டு கண்டம் பாயும் ஏவுகணையை உக்ரைன் மீது பயன்படுத்தியுள்ளது ரஷியா. இதை உக்ரைனின் முன்னாள் தளபதி, 'மூன்றாம் உலகப் போர் தொடங்கியது' என்று வர்ணித்துள்ளார். ஆயிரம் நாள்களைக் கடந்தும் முடிவடையாமல் போர் தொடர்கிறது.

இன்னும் சொன்னால் முன்பைவிடத் தீவிரமாக நடந்து கொண்டிருக்கிறது. உக்ரைன் நேட்டோ கூட்டமைப்பில் இணைய வதற்கு எதிர்ப்பு தெரிவித்த ரஷிய அதிபர் புதின், கடந்த பிப்ரவரி 24, 2022 அன்று உக்ரைன் மீது போர் தொடுக்க தமது ராணுவத்திற்கு அதிரடியாக உத்தரவிட்டார். வான்வழித் தாக்குதல்கள், தரைவழித் தாக்குதல்கள் நடத்தியதையடுத்து உக்ரைன் எல்லைக்குள் ரஷிய ராணுவம் நுழைந்தது.