சிபிஐ விசாரணைக்கு எதிராக தமிழக அரசு மேல்முறையீடு

கள்ளக்குறிச்சி கள்ளச்சாராய உயிரிழப்பு தொடர்பான வழக்கை மத்திய புலனாய்வுத்துறையின் (சிபிஐ) விசாரணைக்கு மாற்றி சென்னை உயர்நீதிமன்றம் பிறப்பித்த உத்தரவுக்கு எதிராக உச்சநீதிமன்றத்தில் தமிழக அரசு மேல்முறையீட்டு மனு தாக்கல் செய்துள்ளது.

கள்ளக்குறிச்சி கருணாபுரம் பகுதியில் கடந்த ஜூன் மாதம் கள்ளச்சாராயம் குடித்து 67 பேர் உயிரிழந்தனர். இது தொடர்பான வழக்கை சிபிஐ விசாரணைக்கு மாற்ற உத்தரவிடக் கோரி அதிமுக, தேமுதிக, பாஜக தரப்பில் சென்னை உயர்நீதிமன்றத்தில் வழக்குகள் தாக்கல் செய்யப்பட்டன.

இந்த வழக்குகளை விசாரித்த சென்னை உயர்நீதிமன்ற நீதிபதிகள் கிருஷ்ணகுமார், பாலாஜி ஆகியோர் அடங்கிய அமர்வு, கள்ளக்குறிச்சி கள்ளச்சாராயமரணம் தொடர்பான வழக்குகளை சிபிஐ விசாரணைக்கு மாற்றி நவ. 20-ஆம் தேதி உத்தரவிட்டிருந்தது.

இதையடுத்து, சிபிஐ விசாரணைக்கு பிறப்பிக்கப்பட்ட உத்தரவை எதிர்த்தும், உயர்நீதிமன்ற உத்தரவுக்குத் தடை விதிக்கக் கோரியும் தமிழக அரசு தரப்பில் வழக்குரைஞர் டி.குமணன் மூலம் உச்சநீதிமன்றத்தில் மேல்முறையீட்டு மனு தாக்கல் செய்யப்பட்டுள்ளது.