ரயில் நிலையத்தில் ‘தடம் மாறும்’ பேட்டரி வாகனங்களின் சேவை

கூடுதல் பணம் வசூலிப்பதாக புகார்

ரயில் நிலையங்களில் செயல்படும் பேட்டரி வாகனங்கள் மாற்றுத்திறனாளிகள், முதியோருக்கு முன்னுரிமை அளிக்காமல் வணிக நோக்கில் இயக்கப்படுவதைத் தடுக்க ரயில்வே நிர்வாகம் நடவடிக்கை எடுக்க வேண்டும் என மாற்றுத்திறனாளிகள் கோரிக்கை விடுத்துள்ளனர்.

ரயில் நிலையங்களை மாற்றுத்திறனாளிகள் எளிதில் அணுக வேண்டும் எனும் நோக்கில், 2006-ஆம் ஆண்டு சென்ட்ரலில் முதல் பேட்டரி வாகன (மின்கல வாகனம்) வசதி ஏற்பாடு செய்யப்பட்டது. இதில் மாற்றுத்திறனாளிகள் இலவசமாக அழைத்துச் செல்லப்பட்டனர். பின்னாளில், முதியவர்களும் அழைத்துச் செல்லப்பட்டனர். இதைத் தொடர்ந்து, முக்கிய ரயில் நிலையங்களிலும் பேட்டரி வாகனங்கள் பல்வேறு திட்டங்கள் மற்றும் தனியார் நிறுவனங்களின் சிஎஸ்ஆர் நிதி மூலம் கொண்டுவரப்பட்டன.

தொடர்ந்து, பேட்டரி வாகனத்தை இயக்கும் ஓட்டுநருக்கு ஊதியம், வாகனப் பராமரிப்புக்கு என்று ஒரு நபருக்கு ரூ.10 வாங்கவேண்டும் என ரயில்வே நிர்வாகம் முடிவெடுத்தது. சமூகப் பணியாக தொடங்கப்பட்ட இந்தத் திட்டம் தற்போது வணிக நோக்கில் மாறியுள்ளதாக மாற்றுத்திறனாளிகள் வேதனை தெரிவித்துள்ளனர்.