பலிக்கக் கூடாத ஜோதிடப் பலன்!

து வருடம் என்றாலே புத்தாண்டு சபதங்கள் குறித்த எண்ணங்கள் வந்து, புத்தாண்டு பிறந்த சில நாட்களில் சபதங்கள் மறந்து போகின்றன.

- எஸ். ஸ்ரீதுரை

புத்தாண்டு சபதத்தைக் காட்டிலும், புதிய ஆண்டு நமக்கெல்லாம் எப்படி அமையும் என்பதை ஜோதிட அடிப்படையில் தெரிந்து கொள்வதற்கு நம்மில் பெரும்பாலானவர்களுக்கு ஆர்வம் தோன்றுவது சகஜம். பல்வேறு ஜோதிடர்கள் பத்திரிகைகளின் வாயிலாகவும், தனிப்பட்ட வெளியீடுகளாகவும் புத்தாண்டு பலன்களை வெளியிட்டுவருகின்றனர். சமீப வருடங்களில் தனியார் தொலைக்காட்சி சானல்கள் பிரபல ஜோதிடர்களை அழைத்து, அவர்கள் கூறும் புத்தாண்டு பலன்களை ஒளிபரப்புவது வழக்கத்திற்கு வந்துள்ளது.

வரவிருக்கும் 2025-ஆம் ஆங்கிலப் புத்தாண்டு இதற்கு முந்தைய ஆண்டுகளைக் காட்டிலும் கூடுதலான பரபரப்பை இந்த உலகெங்கிலும் ஏற்படுத்தியுள்ளது. மீண்டும் ஓர் உலகப் போர் மூண்டு விடுமோ என்ற அச்சமே இந்த பரபரப்புக்கு அடிப்படை காரணமாகும்.

மூன்றாம் உலகப் போர் குறித்த அச்சத்திற்குத் தற்கால உலக நடப்புகள் மட்டுமே காரணமல்ல. மேலைநாட்டு தீர்க்கதரிசிகளாகக் கருதப்படும் நாஸ்ட்ராடாமஸ், பாபா வங்கா ஆகியவர்களின் கணிப்புகளும் சேர்ந்தே இத்தகைய அச்சத்தினை ஏற்படுத்தியுள்ளன என்றால் அது மிகையாகாது.

16-ஆம் நூற்றாண்டைச் சேர்ந்த நாஸ்ட்ராடாமஸ் (பிரான்ஸ்), சென்ற நூற்றாண்டைச் சேர்ந்த பாபா வங்கா (பல்கேரியா) ஆகிய இருவரும் இவ்வுலகின் எதிர்காலம் குறித்து வெளியிட்டுள்ள கணிப்புகளில் சுமார் 80 சதவீத கணிப்புகள் பலித்திருப்பதாக வரும் செய்திகள் பீதிக்கு உரமூட்டுகின்றன.